الیکٹرک کار میں لگنے والی آگ اس قدر خوفناک اندز میں بھڑکی کہ گھر جل کر تباہ ہوگیا جبکہ مکینوں نے بڑی مشکل سے جان بچائی۔
برطانوی میڈیا رپورٹس کے مطابق جلنے والی الیکٹرک کار ہیمپشائر کے علاقے چاندلر فورڈ میں گھر کے باہر کھڑی تھی، یہ الیکٹرک کار رات بھر چارج ہوتی رہی تھی جبکہ جمعہ کی صبح تقریباً 5 بجے کے قریب اس میں خوفناک طریقے سے آگ لگ گئی۔
ڈرائیو وے پر الیکٹرک کار میں آگ لگنے سے مکان جل کر خاکستر ہو گیا،اس دوران تین مختلف فائر اسٹیشنوں کے عملہ آگ بجھانے جائے وقوع پر پہنچا۔
آگ کے شعلے ڈرائیو وے پر دو دیگر کاروں تک پھیل گئے اور گھر تک پہنچ گئے، وہاں لگے سی سی ٹی وی کیمرے کی ریکارڈنگ میں دیکھا جاسکتا ہے کہ آگ کس قدر خطرناک تھی اور وہاں کافی مقدار میں کالا دھواں بھی پھیل گیا تھا۔
تاہم ریسکیو عملے نے فوری کارروائی کرتے ہوئے گھر کے اندر موجود سبھی افراد کو نکال لیا اور حادثے میں کسی کو کوئی نقصان نہیں پہنچا۔
دن کی روشنی میں لی گئی تصاویر سے پتہ چلتا ہے کہ گھر کے سامنے والے حصے کو شدید نقصان پہنچا، جس میں کئی کھڑکیوں کے شیشے اڑ گئے ہیں اور اینٹوں اور لکڑی کا کام دھوئیں سے سیاہ ہو چکا ہے۔
ہیمپشائر فائر اینڈ ریسکیو کے ترجمان نے بتایا کہ فائر فائٹرز نے آگ پر قابو پالیا جس میں متعدد گاڑیوں کو نقصان پہنچا آگ آج صبح چاندلر فورڈ میں چارلیکوٹ ڈرائیو پر واقع ایک گھر تک پھیل گئی تھی۔
