آسٹریلوی کرکٹر مچل اسٹارک نے آئی پی ایل 2025 کے بقیہ میچز کھیلنے کے لیے سکیورٹی خدشات کے باعث بھارت واپس جانے سے انکار کر دیا۔
آسٹریلوی میڈیا کا اس حوالے سے کہنا ہے کہ مچل اسٹارک نے فرنچائز کو بقیہ میچز سے عدم دستیابی سے متعلق آگاہ کردیا ہے، فاسٹ بولر نے خطے میں پائی جانے والی کشیدگی کی وجہ سے یہ فیصلہ کیا ہے اور انہوں نے دہلی کیپیٹلز کو بھی اپنے فیصلے سے آگاہ کر دیا ہے۔
واضح رہے کہ فاسٹ بولر دھرم شالا میں بلیک آوٹ سے روکے جانے والے میچ کا حصہ تھے اور اس وقت وہاں ان کی اہلیہ ایلیسا ہیلی بھی موجود تھیں اور انہوں نے ایک انٹرویو میں دھرم شالا کے حالات کھل کر بتائے تھے۔
دوسری جانب آسٹریلوی میڈیا کا کہنا ہے کہ فاسٹ بولر جوش ہیزل ووڈ کندھے کی تکلیف کے باوجود آئی پی ایل میں شرکت کریں گے، جوش ہیزل ووڈ رائل چیلنجر بنگلور کو پلے آف سے قبل جوائن کریں گے۔
یاد رہے کہ پاک بھارت بڑھتی کشیدگی کے پیش نظر آئی پی ایل 2025 کو گذشتہ جمعہ کو ایک ہفتے کے لیے ملتوی کیا گیا تھا اور اب لیگ کے بقیہ میچز 17 مئی سے دوبارہ شروع کئے جارہے ہیں۔
بی سی سی آئی کے بقیہ میچز نئے شیڈول کے مطابق آئی پی ایل 17 مئی سے 3 جون تک کھیلے جائیں گے۔ تاہم جنوبی افریقہ جس نے جون میں آسٹریلیا کے خلاف ورلڈ ٹیسٹ چیمپئن شپ کا فائنل کھیلنا ہے۔ اس بڑے میچ کی تیاری کے لیے آئی پی ایل میں مصروف اپنے تمام کھلاڑیوں کو وطن واپس بلایا ہے۔
بھارتی میڈیا کے مطابق بی سی سی آئی حکام نے کرکٹ جنوبی افریقہ سے اپنے کھلاڑیوں کو آئی پی ایل کے اختتام تک لیگ میں رہنے کی درخواست کی تھی لیکن جنوبی افریقی بورڈ نے ورلڈ ٹیسٹ چیمپئن شپ فائنل کی اہمیت کے پیش نظر بھارتی بورڈ کی اس درخواست کو مسترد کر دیا ہے۔
بابراعظم غیر ملکی کرکٹر کی ٹرولنگ کا شکار بن گئے
جنوبی افریقہ کے ہیڈ کوچ شکری کونراڈ کا اس حوالے سے کہنا ہے کہ ڈائریکٹر کرکٹ اور سی ایس اے کے سی ای او آئی پی ایل حکام سے بات کر رہے ہیں لیکن وہ اپنا موقف تبدیل کرنے کے موڈ میں نہیں ہیں۔
