راولپنڈی: اینٹی نارکوٹکس فورس (اے این ایف) نے 8 مختلف کارروائیوں میں خاتون سمیت 14 ملزمان کو گرفتار کر کے 5 کروڑ 65 لاکھ روپے سے زائد مالیت کی 245.15 کلو گرام منشیات برآمد کر لی۔
ترجمان اے این ایف نے بتایا کہ راولپنڈی میں یونیورسٹی کے قریب گاڑی سے 1.100 کلو گرام منشیات برآمد کر کے 2 ملزمان کو گرفتار کیا جبکہ گڈو چوک حیدر آباد اور پیٹرول پمپ کے قریب ملزم سے 1 کلو افیون اور 200 گرام آئس برآمد کی گئی، گرفتار ملزمان نے تعلیمی اداروں کے طلبہ کو منشیات فروخت کرنے کا اعتراف کیا ہے۔
انہوں نے بتایا کہ جناح انٹرنیشنل ایئرپورٹ کراچی پر براستہ دبئی اور ریاض جانے والے 3 مسافروں کے سامان سے منشیات برآمد ہوئی جبکہ اسلام آباد ٹول پلازہ کے قریب گاڑی سے 139.200 کلو گرام افیون اور 45.600 کلو گرام منشیات برآمد کر کے 2 ملزمان کو گرفتار کیا گیا۔
یہ بھی پڑھیں: اے این ایف کی مختلف شہروں میں کارروائیاں، 9 کروڑ سے زائد مالیت کی منشیات برآمد
اے این ایف کے مطابق زلہ بھوانی حب میں پیٹرول پمپ کے قریب مسافر بس سے 7 کلو کرسٹل ہیروئن برآمد کر کے ایک خاتون سمیت 2 ملزمان کو گرفتار کیا۔
اسی طرح، ائیرپورٹ روڈ کوئٹہ کے قریب بلیلی کے مقام پر گاڑی سے 30 کلو افیون برآمد کر کے ملزم کو حراست میں لیا گیا، ائیرپورٹ روڈ کوئٹہ کے قریب بلیلی کے مقام پر ایک اور کارروائی کے دوران گاڑی سے 20 کلو افیون برآمد کی گئی۔
ترجمان نے بتایا کہ دریا خان پل، بھکر روڈ اور ڈیرہ اسماعیل خان کے قریب 2 ملزمان کے قبضے سے 600 گرام آئس برآمد کی، گرفتار ملزمان کے خلاف انسداد منشیات ایکٹ کے تحت مقدمات درج کیے گئے۔
