نیویارک : امریکی اخبار نیویارک ٹائمز نے آپریشن بُنیان مَرصوص کو پاکستانی مسلح افواج کی بڑی کامیابی قرار دے دیا اور لکھا بھارتی جارحیت کے منہ توڑجواب کے بعد جنرل عاصم منیر”قومی نجات دہندہ”کے طور پر ابھرے۔
تفصیلات کے مطابق امریکی اخبار نیویارک ٹائمز نے آپریشن بُنیان مَرصوص کے حوالے سے مضمون میں کہا پاکستان طویل عرصے سے سیاسی، اقتصادی اور سلامتی کے بحرانوں میں گھرا ہوا تھا لیکن بھارتی جارحیت کیخلاف آپریشن بنیان مرصوص میں بڑی فتح نے سب بدل کر رکھ دیا۔
امریکی اخبار نے مضمون میں لکھا ‘بھارت کیساتھ جھڑپ میں کامیابی سے پاکستانی مسلح افواج کے وقار میں مزید اضافہ ہوا، پاکستانی مسلح افواج کی جیت پر اُن کے حق میں ریلیاں بھی نکالیں گئیں، پاکستان اور بھارت کے حالیہ تنازع نے عوامی جذبات میں تبدیلی کی لہر پیدا کی۔
پاکستانی شہری نے کہا کہ ایسا محسوس ہوتا ہے کہ ہم نے کچھ جیت لیا ہے، اب ہم ناکام ریاست نہیں ہیں، پروپیگنڈے کے باوجود پاکستان کی مسلح افواج نے اپنی طاقت اور اثر و رسوخ کو مزید مستحکم کیا۔
اخبار نے لکھا بھارت نے پہلگام فالس فلیگ آپریشن کا الزام پاکستان پرعائد کرکے جارحیت کا آغاز کیا، پاکستان نے منہ توڑ جواب کے بعد بڑی جنگ سے بچنے کیلئے بھارتی سیزفائرکی پیشکش کو قبول کیا۔
نیویارک ٹائمز کا کہنا تھا کہ پاک فضائیہ نے آپریشن میں بھارتی لڑاکا طیاروں کو زمیں بوس کر کے سب کو حیران کیا، بنیان مرصوص کی کامیابی مسلح افواج بالخصوص جنرل عاصم منیر کی قیادت پر اعتماد بحال کرتی ہے، بھارتی جارحیت کے منہ توڑ جواب کے بعد جنرل عاصم منیر”قومی نجات دہندہ” کے طور پر ابھرے، اس قسم کی فتوحات فوج کی پیشہ ورانہ طاقت کو سیاسی اثرو رسوخ سے زیادہ تقویت دیتی ہیں۔
