ملتان: حساس اداروں اور نیشنل سائبر کرائم انویسٹی گیسن ایجنسی نے کارروائی کرتے ہوئے عالمی سائبر کرائم نیٹ ورک سے منسلک کارندے گرفتار کرلیے۔
اے آر وائی نیوز کے مطابق ملزمان امریکی شہریوں اور مالیاتی اداروں کو لوٹنے والے نیٹ ورک سے منسلک ہیں، ہارٹ سینڈر گروپ کے خلاف ایف بی آئی اور ڈچ پولیس کی نشاندہی پر کارروائی کی گئی۔
ایڈیشنل ڈائریکٹر ملتان کی سر براہی میں ٹیم نے 21 رکنی گروہ کےمتعدد ارکان کو پکڑا، رمیض شہزاد کا گروہ امریکیوں اور غیرملکیوں سے کروڑ ڈالر کے فراڈ میں ملوث ہے، رمیض شہہزاد کا تعلق لیہ سے ہے، ملزم نے لاہور اور ملتان میں نیٹ ورک بنا رکھا تھا۔
لاہور میں گروہ کے چار گھروں پر چھاپے مار کر بڑی مقدار میں ڈیجیٹل مواد برآمد کیا، گرفتار ملزمان میں محمد اسلم، عدیل عزیز، اسامہ نواز، عبدالمعیز اور شعیب نذیر شامل ہیں، ملزمان سے موبئائل فونز، لیپ ٹاپس اور ڈیٹا اسٹوریج ڈیوائسز برآمد ہوئی ہیں۔
ملزمان کے خلاف پیکا اور تعزیرات پاکستان کی متعدد دفعات کے تحت مقدمہ درج کرلیا گیا ہے۔
گرفتار ملزمان کا 7 روزہ جسمانی ریمانڈ حاصل کرکے ان کے نام ای سی ایل میں شامل کرلیے گئے ہیں۔
این سی سی اے کا کہنا ہے کہ غیرملکی شہریوں کو لوٹنے میں استعمال فشنگ ویب سائٹس کو ٹریک کرلیا، گیمبلنگ اور گیمنگ کی آڑ میں فنانشل کرائم میں ملوث ٹولز تحویل میں لیے ہیں۔
