کیلیفورنیا: امریکی ریاست کیلیفورنیا میں ایک فرٹیلیٹی کلینک کے باہر ہولناک بم دھماکے سے ایک شخص ہلاک، 4 زخمی ہو گئے۔
ایسوسی ایٹڈ پریس کے مطابق ریاست کیلیفورنیا کے شہر پام اسپرنگز میں ہفتے کی صبح ایک فرٹیلیٹی کلینک پر دھماکا ہوا، جس کے نتیجے میں ایک شخص ہلاک اور چار زخمی ہو گئے ہیں۔
دھماکا فرٹیلیٹی کلینک کے باہر ہوا، جو معروف ڈاکٹر مہر عبداللہ چلاتے ہیں، دھماکا اس قدر شدید تھا کہ کلینک کی چھت اڑ گئی اور ارد گرد کی عمارتوں کو بھی نقصان پہنچا۔ ایف بی آئی نے کہا ہے کہ دھماکے میں کلینک ہی کو نشانہ بنایا گیا ہے اور واردات پر دہشت گردی کے شبہ کا اظہار کیا ہے۔
ایف بی آئی حکام کے مطابق بم کار میں نصب تھا، جو دھماکے کے نتیجے میں مکمل طور پر تباہ ہو گئی ہے، سیکیورٹی ادارے واقعے کی نوعیت اور ممکنہ دہشت گردی کے پہلو سے تحقیقات کر رہے ہیں۔
اے پی کے مطابق کلینک بند تھا، ڈاکٹر مہر عبداللہ نے ایسوسی ایٹڈ پریس کو بتایا کہ ان کا عملہ محفوظ رہا ہے۔ ایف بی آئی کے لاس اینجلس فیلڈ آفس کے سربراہ اکیل ڈیوس نے شام کی ایک نیوز کانفرنس کو بتایا کہ ہمیں کوئی شبہ نہیں کہ یہ دہشت گردی کی ایک جان بوجھ کر کی گئی کارروائی ہے۔ تاہم انھوں نے یہ بتانے سے انکار کیا کہ حکام اس نتیجے پر کیسے پہنچے۔ قانون نافذ کرنے والے ایک اہلکار نے بتایا کہ تفتیش کاروں نے جائے وقوعہ سے ایک AK-47 طرز کی رائفل بھی برآمد کی ہے۔
ایف بھی آئی حکام کے مطابق ہلاک ہونے والے شخص پر شبہ ہے کہ دھماکا اسی نے کیا تھا، تاہم اس کی شناخت نہیں ہو سکی ہے، قانون نافذ کرنے والے ادارے اس امکان کا بھی جائزہ لے رہے ہیں کہ اس دھماکے کو براہ راست نشر بھی کیا گیا تھا۔
ڈاکٹر مہر عبداللہ نے کیا بتایا؟
اے پی کو فون انٹرویو پر ’’امریکن ری پروڈکٹیو سینٹرز‘‘ کے مالک مشہور ڈاکٹر مہر عبداللہ نے بتایا کہ دھماکے سے ان کی پریکٹس کے دفتر کو نقصان پہنچا ہے جہاں وہ مریضوں کے ساتھ بیٹھ کر مشاورت کرتے تھے۔ انھوں نے بتایا کہ کلینک کی IVF لیب اور ذخیرہ شدہ ایمبریو اس کلینک پر نہیں رکھے گئے ہیں، اس لیے انھیں نقصان نہیں پہنچا۔
مہر عبداللہ نے کہا ’’اللہ کا شکر ہے کہ آج ایک دن ایسا تھا کہ ہمارے پاس کوئی مریض نہیں تھا۔‘‘ دوسری طرف پام اسپرنگز کے میئر پرو ٹیم نومی سوٹو نے اس کلینک کو ’’جائے امید‘‘ قرار دیا اور کہا ’’یہ ایک ایسی عمارت ہے جس میں لوگ اپنا خاندان شروع کرنے یا بڑھانے کے لیے جاتے ہیں۔‘‘
View this post on Instagram
