کراچی: پاکستان پیپلز پارٹی کے چیئرمین بلاول بھٹو زرداری نے ایک ٹویٹ میں بتایا کہ ’’وزیر اعظم شہباز شریف کی جانب سے رابطہ کیا گیا، انھوں نے درخواست کی کہ وفد کے ساتھ عالمی سطح پر پاکستان کی نمائندگی کروں۔‘‘
پی پی چیئرمین بلاول بھٹو نے ٹویٹ میں مزید لکھا کہ ان سے درخواست کی گئی کہ وفد کی قیادت کرتے ہوئے دنیا میں پاکستان کا امن کا مؤقف پیش کروں، بلاول نے کہا ’’مجھے عالمی سطح پر پاکستان کی نمائندگی کی ذمہ داری قبول کرنے پر فخر ہے۔‘‘
بلاول بھٹو کا ٹویٹ میں کہنا تھا کہ وہ مشکل حالات میں پاکستان کی خدمت کے لیے پر عزم ہیں۔
I was contacted earlier today by Prime Minister @CMShehbaz, who requested that I lead a delegation to present Pakistan’s case for peace on the international stage. I am honoured to accept this responsibility and remain committed to serving Pakistan in these challenging times.…
— BilawalBhuttoZardari (@BBhuttoZardari) May 17, 2025
واضح رہے کہ چیئرمین پی پی پاک بھارت کشیدگی کے پیش نظر حکومتی وفد کے ساتھ یورپ کا دورہ کریں گے، بلاول وفد کے ساتھ عالمی برادری کو بھارتی جارحیت سے آگاہ کریں گے، اس سلسلے میں وزیر اعظم شہباز شریف نے بلاول بھٹو سے ٹیلی فونک رابطہ کیا تھا۔
پاکستان کی بھارت کیخلاف سفارتی سطح پر جوابی کارروائی، بلاول یورپ کا دورہ کرینگے
ذرائع کے مطابق وزیر اعظم شہباز شریف نے بلاول بھٹو زرداری کی سربراہی میں کمیٹی قائم کر دی ہے، جس میں خرم دستگیر، حنا ربانی کھر اور جلیل عباس جیلانی شامل ہیں۔ پاکستان کی جانب سے دیگر ممالک کو بھی وفود بھیجے جائیں گے، وفود امریکا، روس سمیت کئی ممالک کے دورے کریں گے اور بھارتی جارحیت سے انھیں آگاہ کریں گے۔
خیال رہے کہ حالیہ جنگ میں پاکستان کے ہاتھوں شرمناک شکست کے بعد بھارت نے عالمی سطح پر دوروں کے لیے وفد تشکیل دیا ہے جو پاکستان مخالف پروپیگنڈا کرے گا۔
