غزہ: اسرائیلی فوج نے ایک مہلک کارروائی میں القسام بریگیڈ کے کمانڈر اور یحییٰ سنوار کے بھائی محمد سنوار کو ساتھیوں سمیت شہید کر دیا۔
العربیہ کے مطابق اتوار کے روز العربیہ اور الحدث نے رپورٹ کیا ہے کہ خان یونس میں اسرائیل کے فضائی حملے میں حماس کے عسکری ونگ القسام بریگیڈ کے کمانڈر محمد السنوار شہید ہو چکے ہیں۔
محمد سنوار کی لاش جنوبی غزہ کے شہر خان یونس میں ایک سرنگ سے مل گئی ہے، جہاں ان کے دس ساتھیوں کی لاشیں بھی برآمد ہوئیں، محمد السنوار گزشتہ دنوں خان یونس کے مشرق میں یورپی اسپتال کے قریب اسرائیل کے شدید فضائی حملے میں نشانہ بنے، اسی حملے میں رفح بریگیڈ کے کمانڈر محمد شبانہ بھی مارے گئے ہیں۔
سعودی الحدث چینل کی ایک رپورٹ کے مطابق محمد سنوار کی لاش خان یونس میں حماس کے ایک سرنگ کمپلیکس کے کھنڈرات سے آئی ڈی ایف کی بمباری کے 5 دن بعد ملی۔
غزہ جنگ بندی : دوحہ میں دوبارہ مذاکرات، حماس کی تصدیق
قبل ازیں، اسرائیل نے دعویٰ کیا تھا کہ محمد سنوار کو ایک خفیہ پناہ گاہ میں نشانہ بنایا گیا ہے، جو یورپی اسپتال کے نیچے واقع تھی، اسرائیلی نشریاتی ادارے نے بدھ کے روز ایک ویڈیو بھی جاری کی تھی، جس میں بتایا گیا تھا کہ حملہ اس وقت کیا گیا جب محمد السنوار مذکورہ مقام پر موجود تھے۔
العربیہ اور الحدث کے ذرائع نے محمد سنوار کی شہادت کی تصدیق کر دی ہے۔ انھیں ان کے بھائی یحییٰ السنوار کی شہادت کے بعد القسام بریگیڈ کی قیادت سونپی گئی تھی، جب اکتوبر 2024 میں اسرائیل نے انھیں نشانہ بنایا تھا۔
