پشاور: خیبر پختونخوا کی حکومت ماہرین کو لاکھوں روپے تنخواہ دے گی، اور بھرتی اشتہارات کے ذریعے کی جائے گی۔
تفصیلات کے مطابق حکومتی محکموں کی تکنیکی صلاحیت بڑھانے کے لیے خیبر پختونخوا کی حکومت نے مارکیٹ بیسڈ سیلری پالیسی 2025 نافذ کر دی۔
محکمہ خزانہ کے پی کی جانب سے جاری دستاویز کے مطابق نئی پالیسی فوری طور پر نافذ العمل ہوگی، یہ پالیسی 2019 کی مارکیٹ بیسڈ ٹیلنٹ پالیسی کی جگہ لے گی، اس پالیسی کا مقصد اعلیٰ مہارت یافتہ ماہرین کو مارکیٹ ریٹ کے مطابق تنخواہ پر بھرتی کرنا ہے۔
16 سالہ تعلیم یافتہ افراد 4 گریڈ میں بھرتی کے اہل ہوں گے، ایم پی ایس ون کے تحت 15 سال تجربہ رکھنے والوں کو 9 لاکھ روپے ماہانہ تنخواہ دی جائے گی، نئی پالیسی کے تحت بھرتی شفاف اور میرٹ پر اور کئی مراحل پر مشتمل ہوگی، کم از کم دو قومی اخبارات میں اشتہارات کے ذریعے بھرتی کی جائے گی۔
خیبر پختونخوا حکومت کا سندھ میں مقیم اپنے باشندوں کیلیے اہم فیصلہ
محکمہ خزانہ کی دستاویز کے مطابق سرکاری ملازمین بھی پالیسی کے تحت درخواست دے سکتے ہیں، بھرتی کی منظوری خیبرپختونخوا حکومت دے گی، تمام تقرریاں کنٹریکٹ پر ہوں گی، ابتدائی مدت 3 سال جب کہ توسیع مزید 2 سال تک ہو سکے گی۔
پالیسی دستاویز میں یہ بھی کہا گیا ہے کہ ملازمین کو پنشن نہیں ملے گی، بلکہ ایک ماہ کی بنیادی تنخواہ سالانہ بنیاد پر گریجویٹی کے طور پر دی جائے گی۔
