قسط کی رقم نہ ملنے پر وصولی کے لیے آئے شخص نے خاتون اور اس کی ڈیڑھ سالہ بچی کے ساتھ وہ سلوک کیا کہ دل دہل گئے۔
یہ افسوسناک واقعہ پنجاب کے علاقے رحیم یار خان میں پیش آیا جہاں قسط کی رقم کی عدم ادائیگی پر خاتون اور اس کی ڈیڑھ سالہ بچی کو نہر میں پھینک دیا گیا۔
پولیس کے مطابق یہ واقعہ بھٹہ کالونی تھانہ اے ڈویژن کی حدود میں پیش آیا۔ جہاں ایک شخص قسط کی وصولی کے لیے گھر آیا لیکن عدم ادائیگی پر وحشیانہ انداز اختیار کرتے ہوئے خاتون اور اس کی بیٹی کو نہر میں پھینک دیا۔
واقعہ کی اطلاع ملتے ہی پولیس اور غوطہ خور جائے وقوعہ پر پہنچ گئے جب کہ ملزم فرار ہونے میں کامیاب ہو گیا۔
ریسکیو ذرائع کا کہنا ہے کہ غوطہ خوروں نے خاتون کو بحفاظت نہر سے نکال لیا ہے تاہم بچی اب تک نہیں مل سکی اور اس کی تلاش جاری ہے۔
پولیس نے واقعہ کا مقدمہ درج کرکے ملزم کی گرفتاری کے لیے کوششیں شروع کر دی ہیں۔
