لاہور : سیشن عدالت نے اداروں کے خلاف سوشل میڈیا پر پوسٹ شیئر کرنے کے کیس میں پاکستان تحریک انصاف کی کارکن صنم جاوید کی درخواست ضمانت خارج کردی۔
تفصیلات کے مطابق سیشن عدالت میں اداروں کے خلاف سوشل میڈیا پر پوسٹ شیئر کرنے کے مقدمے میں پاکستان تحریک انصاف کی کارکن صنم جاوید کی درخواست ضمانت پر سماعت ہوئی۔
ایڈیشنل سیشن جج سلمان گھمن نے وکلا کے دلائل مکمل ہونے پر فیصلہ سنایا، جس میں پی ٹی آئی کارکن کی درخواست ضمانت خارج کردی۔
ایف ائی اے نے رہنما پی ٹی آئی کے خلاف مقدمہ درج کر رکھا ہے۔
مزید پڑھیں : صنم جاوید اور ان کے شوہر کو گرفتار کرلیا گیا
یاد رہے گذشتہ ماہ پاکستان تحریک انصاف کی رہنما صنم جاوید اور ان کے شوہر کو 9 مئی جلاؤ گھیراؤکے مقدمات میں گرین ٹاؤن سے گرفتار کیا تھ،
حکام کا کہنا تھا کہ پاکستان تحریک انصاف کی رہنما اور ان کے شوہر کیخلاف دہشت گردی کے مقدمات درج تھے۔
واضح رہے گذشتہ سال جسٹس اسجد جاوید گھرال کی سربراہی میں دو رکنی بینچ نے صنم جاوید کے خلاف گوجرانوالہ میں 9 مئی سے واقعات سے متعلق درج مقدمے کی سماعت کی تھی اور انہیں مقدمے سے ڈسچارج کرنے کا حکم دیا تھا۔
