راولپنڈی: لاہور پولیس کی تفتیشی ٹیم بانی پی ٹی آئی کا پولی گرافک ٹیسٹ کرنے پھر اڈیالہ جیل پہنچ گئی۔
تفصیلات کے مطابق لاہور پولیس کی تفتیشی ٹیم آج پھراڈیالہ جیل پہنچ گئی ، تفتیشی ٹیم گیٹ نمبر 5 سے اڈیالہ جیل روانہ ہوئی ، ٹیم کی سربراہی ڈی ایس پی آصف جاوید کررہے ہیں۔
تفتیشی ٹیم میں انسپکٹرمحمداسلم، انسپکٹرمحمدعالم اور انسپکٹر محمد ارحم اور پنجاب فرانزک یونٹ کے عابد ایوب شامل ہیں۔
جیل ذرائع کا کہنا ہے کہ ٹیم عمران خان کا 9مئی کےکیسز میں پولی گرافک ٹیسٹ کرے گی۔
گذشتہ روز بانی پاکستان تحریک انصاف (پی ٹی آئی) عمران خان نے 9 مئی کیسز کے سلسلے میں وکلا کی غیر موجود گی میں پولی گرافک ٹیسٹ کروانے سے انکار کر دیا تھا۔
مزید پڑھیں : بانی پی ٹی آئی کا پولی گرافک ٹیسٹ کروانے سے انکار
یاد رہے 15 مئی کو لاہور کی انسداد دہشتگرد عدالت نے عمران خان کے خلاف درخواست منظور کرتے ہوئے پولی گرافک اور فوٹو گرامیٹک کروانے کا حکم دیا تھا۔
عدالتی فیصلے میں کہا گیا تھا کہ بانی پی ٹی آئی کے پولی گرافک اور فوٹو گرامیٹک ٹیسٹ کروائے جائیں، عدالت نے 12 مقدمات میں ان کے ٹیسٹوں کی اجازت دی تھی۔
عدالت نے کہا تھا کہ 12 روز کے اندر جیل میں ملزم سے ملاقات کر کے تمام ٹیسٹ کیے جائیں، استغاثہ کی درخواست پر آڈیو میچنگ ٹیسٹ کی بھی اجازت دے دی گئی تھی۔
