ایف آئی اے نے افغان شہریوں کو پاکستان پاسپورٹ پر ورک ویزا جاری کرنے والے منظم گینگ کے 3 ارکان کو گرفتار کرلیا۔
تفصیلات کے مطابق ایف آئی اے کاؤنٹر ٹیررازم ونگ اسلام آباد نے انسانی اسمگلنگ اور جعلی پاسپورٹ نیٹ ورکس کے خلاف کریک ڈاؤن کرتے ہوئے منظم گینگ کے 3 ارکان گرفتار کرلئے گئے۔
گرفتار ملزمان کی شناخت محمد عالم زیب، آصف خان اور ہارون الرشید کے نام سے ہوئی ہے، گرفتار ملزمان بین الاقوامی منظم گینگ کا حصہ ہیں، منظم گینگ افغان شہریوں کو جعل سازی سے پاکستانی شناختی کارڈز ، مشین ریڈ ایبل پاسپورٹس اور سعودی عرب کے ورک ویزوں کے اجراء میں ملوث پایا گیا۔
3 کروڑ 50 لاکھ روپے کے ویزا فراڈ میں ملوث بدنام زمانہ اشتہاری گرفتار
ترجمان کا کہنا ہے کہ ملزم عالم زیب نے 31 افغان شہریوں کو پاکستان پاسپورٹ پر سعودی عرب کے ورک ویزہ جاری کیے، ملزم آصف خان نے 4 افغان شہریوں کو پاکستان پاسپورٹ پر سعودی عرب کے ورک ویزہ جاری کیے۔
ترجمان نے مزید بتایا کہ ملزم ہارون الرشید نے 58 افغان شہریوں کو پاکستانی پاسپورٹ پر سعودی ورک ویزہ جاری کیے، منظم گینگ کے سرکاری اہلکاروں بشمول امیگریشن اینڈ پاسپورٹ آفس اور نادرا آفس کے اہلکاروں کے ملوث ہونے کا تعین کیا جا رہا ہے۔
