وزیراعلیٰ پنجاب مریم نواز نے پنجاب کے مختلف اضلاع میں طوفان اور بارش کے پیش نظر انتظامیہ اور ریسکیو کو الرٹ رہنے کا حکم دیدیا۔
تفصیلات کے مطابق وزیراعلیٰ پنجاب نے راولپنڈی اور دیگر شہرو ں میں موسلا دھار بارش کے بعد نشیبی علاقے زیر آب آنے کا نوٹس لے لیا ہے، مریم نواز شریف نے راولپنڈی میں واسا افسران کو خود فیلڈ میں پہنچنے کی ہدایت کی ہے۔
وزیراعلیٰ پنجاب مریم نواز نے طوفانی بارشوں کے پیش نظر کہا کہ پانی کا نکاس یقینی بنانے کے لئے تمام وسائل بروئے کار لائے جائیں۔
پنجاب کے مختلف اضلاع میں آندھی اور بارش کے بعد پی ڈی ایم اے پنجاب کی جانب سے بھی الرٹ جاری کیا گیا ہے، ڈپٹی کمشنرز اور ریسکیو اداروں کو ہنگامی صورتحال کے لیے تیار رہنے کی ہدایت کی گئی ہے۔
ڈی جی پی ڈی ایم اے عرفان علی کاٹھیا نے کہا کہ ہنگامی صورتحال سے نمٹنے کے لیے متعلقہ محکمے الرٹ رہیں، پی ڈی ایم اے کنٹرول روم میں صورتحال کی مانیٹرنگ 24 گھنٹے جاری ہے۔
