پنجاب کے شہر ڈسکہ میں بیوپاری کو جعلی نوٹ تھما کر قربانی کیلیے جانور کی خریداری کا انکشاف ہوا ہے۔
پولیس حکام نے بتایا کہ موٹرسائیکل سوار خاتون سمیت دو ملزمان نے جعلی نوٹ دے کر بیوپاری سے 95 ہزار کا دنبہ خریدا، ملزمان کے خلاف مقدمہ درج کر لیا گیا۔
انہوں نے بتایا کہ جعلی نوٹ چلانے والے گروہ میں خواتین بھی شامل ہیں۔
چند روز قبل کراچی کے علاقے کاٹھوڑ کے قریب کیٹل فارم میں ڈکیتی کی بڑی واردات میں 10 سے زائد ڈاکو باڑے سے لاکھوں مالیت کے مویشی لوٹ کر فرار ہوگئے تھے۔
یہ بھی پڑھیں: ڈاکوؤں کے گروہ نے شہریوں کو یرغمال بنا کر قربانی کے جانور لوٹ لیے
ڈاکوؤں نے کیٹل فارم پر دھاوا بولا اور 13 بیل اور بچھیا چھین کر فرار ہوئے تھے۔ کیٹل فارم انتظامیہ نے بتایا تھا کہ رات 2 سے 4 کے درمیان 10 سے زائد ڈاکوؤں نے واردات کی، ملزمان کا گروہ ٹرک بھی ساتھ لایا تھا۔
انتظامیہ کا کہنا تھا کہ چھینے گئے مویشی کی مالیت 30 سے 40 لاکھ روپے کے لگ بھگ ہے۔ پولیس کا کہنا تھا کہ واقعے کی تحقیقات شروع کر دیں اور مقدمہ درج کر رہے ہیں۔
گذشتہ ہفتے شہر قائد کے علاقے بھینس کالونی سے خریدے گئے مویشی ڈاکو لیاقت آباد کے قریب چھین کر فرار ہو گئے تھے۔
واقعے کی سی سی ٹی وی فوٹیج بھی سامنے آئی تھی اور پولیس نے ایف آئی آر بھی درج کر لی تھی جس میں کہا گیا کہ متاثرہ شہری ٹرک میں 3 مویشی لاد کر اورنگی ٹاوٴن کی جانب جا رہا تھا، جب راستے میں ڈاکوؤں نے اسلحے کے زور پر ڈرائیور کو ٹرک سے اتار کر اپنی کار میں سوار کیا۔
مقدمے کے متن کے مطابق ڈاکو جانوروں سے بھرا ٹرک خود لے کر روانہ ہو گئے، اور کچھ فاصلے پر جا کر ٹرک ڈرائیور کو اتار کر ڈاکو فرار ہو گئے، پولیس حکام کا کہنا ہے کہ خالی ٹرک نیپا چورنگی کے قریب سے مل گیا ہے۔
