فلسطین کی مزاحمتی تنظیم حماس کے عسکری ونگ القسام بریگیڈ نے غزہ کے علاقے خان یونس میں اسرائیلی فوجیوں کے ایک گروپ کو بارودی مواد سے اڑا دیا۔
قطری نشریاتی ادارے الجزیرہ کی رپورٹ کے مطابق القسام بریگیڈ نے ایک بیان جاری کیا جس میں اس کا کہنا تھا کہ 20 مئی 2025 کو خان یونس میں واقع القارا ٹاؤن میں ایک گھر کے اندر اسرائیلی فوجیوں کے ایک گروپ کے خلاف انتہائی پیچیدہ آپریشن کیا۔
القسام بریگیڈ نے بتایا کہ ہمارے مجاہدین نے گھر کو متعدد ڈیوائسز کے ذریعے بارودی مواد سے تباہ کر دیا جس میں کئی اسرائیلی فوجی ہلاک اور زخمی ہوئے، اس گھر تک پہنچنے والی سرنگ کو بھی اڑا دیا جہاں متعدد اسرائیلی فوجیوں سے جھڑپیں ہوئیں۔
یہ بھی پڑھیں: اسرائیل کے غزہ منصوبے کے بعد مذاکرات میں مزید دلچسپی نہیں رکھتے، حماس
حماس کے عسکری ونگ نے یہ بھی بتایا کہ حملے کے بعد اسرائیلی ہیلی کاپٹرز فوجیوں کو نکالنے پہنچے تھے۔
اپریل 2025 میں القسام بریگیڈز نے اسرائیل کے ساحلی شہر اشدود پر راکٹ حملہ کیا تھا۔ حماس کا کہنا تھا کہ یہ حملہ غزہ کی پٹی میں شہریوں کو نشانہ بنانے والے اسرائیلی حملوں کے جواب میں کیا گیا۔
اسرائیلی فوج کا کہنا تھا کہ غزہ سے تقریباً 10 پروجیکٹائل فائر کیے گئے، غزہ کی پٹی سے اسرائیلی علاقے میں داخل ہونے والے 10 میزائلوں کی نشاندہی کی گئی اور ان میں سے زیادہ تر کو کامیابی کے ساتھ روک لیا گیا۔
اسرائیل نے مزید کہا تھا کہ تفصیلات کا فی الحال جائزہ لیا جا رہا ہے۔
اسرائیلی اخبار ہاریٹز نے کہا تھا کہ مبینہ طور پر میزائلوں کے ٹکڑے عسقلان اور گان یاونے میں گرے جس سے گاڑیوں کو نقصان پہنچا اور تین افراد معمولی سے زخمی ہوئے۔
