لاہور: پاکستان سپر لیگ پی ایس ایل 10 کی فاتح لاہور قلندرز کے کپتان شاہین آفریدی نے سوشل میڈیا پر اپنے جذبات کا اظہار کیا ہے۔
سوشل میڈیا پر شیئر کی گئی پوسٹ میں شاہین آفریدی نے لاہور قلندرز کی کامیابی کو غیر متزلزل یقین کا نتیجہ قرار دیتے ہوئے کہا کہ انہیں اپنے ہر کھلاڑی اور اسٹاف ممبر پر فخر ہے۔
شاہین کا لاہور قلندرز کے شائقین کا شکریہ ادا کرتے ہوئے کہنا تھا کہ آپ کا جوش، آپ کا جذبہ اور آپ کی بے لوث سپورٹ ہماری سب سے بڑی طاقت اور جیت کا سبب بنی۔
اُنہوں نے کہا کہ لاہور قلندرز کی کامیابی ہمارے فینز کی دعاؤں، صبر اور محبت کا نتیجہ ہے، یہ ٹرافی آپ سب کے لیے ہے اور ہمارے پیارے وطن کے نام ہے۔ پاکستان زندہ باد!
قبل ازیں شاہین نے ایک تصویر شیئر کی تھی جس میں وہ لاہور قلندرز کی جانب سے جیتی گئیں پی ایس ایل کی تین ٹرافیوں کے ساتھ بستر پر بیٹھے اور ہاتھ سے تین کا اشارہ کررہے ہیں۔
اس سے قبل پاکستان سپر لیگ(پی ایس ایل) سیزن 10 کے شاندار اختتام پر پاکستان کرکٹ بورڈ (پی سی بی) کے چیئرمین محسن نقوی نے تشکر کا اظہار کیا۔
پاکستان سپر لیگ (پی ایس ایل) 10 کے فائنل میں لاہور قلندرز نے کوئٹہ گلیڈی ایٹرز کو شکست دے کر تیسری بار ٹائٹل جیت کر کروڑوں روپے کی انعامی رقم حاصل کر لی۔
پی ایس ایل 10کے شاندار اختتام پر چیئرمین پی سی بی محسن نقوی نے کہا کہ پی سی بی و پی ایس ایل کی پوری ٹیم کا دن رات محنت پر شکریہ ادا کرتا ہوں۔
انہوں نے کہا کہ یہ پاک فوج، رینجرز، پولیس اور انتظامیہ کی انتھک محنت کا نتیجہ ہے، آرمی، ائیر فورس اور نیوی کی جرات اور بہادری کو یادگار خراج تحسین پیش کیا گیا، فیلڈ مارشل عاصم منیر، ایئر چیف ظہیر احمد بابر اور نیول چیف نوید اشرف کا خصوصی شکریہ اداکرتا ہوں۔
محسن نقوی کا کہنا تھا کہ پی ایس ایل 10 کا کامیابی سے انعقاد پر امن پاکستان کی جیت ہے، شائقین کرکٹ کے نظم و ضبط اور جوش و خروش کا کوئی جوڑ نہ تھا نہ ہے۔
پی ایس ایل 10 کا ٹائٹل جیتنے پر لاہور قلندرز کو کتنی انعامی رقم ملی؟
چیئرمین پی سی بی نے مزید کہا کہ راولپنڈی اسٹیڈیم کے قریب دشمن کے حملے کے بعد پی ایس ایل کا دوبارہ آغاز چیلنج تھا، پی ایس ایل 10کی کامیابی محفوظ پاکستان کی فتح اور بزدل دشمن کی ایک اور محاذ پر شکست ہے۔
