محکمہ موسمیات کی جانب سے ملک کے مختلف علاقوں میں رواں ہفتے تیز آندھی اور بارش کی پیشگوئی کی گئی ہے، جب کہ آج سے 31 مئی تک ملک کے مختلف حصوں میں موسلا دھار بارش اور ژالہ باری کا بھی امکان ہے۔
موسمیات کی پیشگوئی کے مطابق رواں ہفتے اسلام آباد، پنجاب، خیبر پختونخوا، آزاد کشمیر، گلگت بلتستان اور دیگر مختلف علاقوں میں بارشیں متوقع ہیں، اس لیے تیز آندھی، جھکڑ کے دوران شہریوں کو احتیاطی تدابیر اختیار کرنے کی ہدایت جاری کی گئی ہے۔
محکمہ موسمیات کا کہنا ہے کہ سندھ کے کچھ بالائی، جنوب مشرقی علاقوں میں گرج چمک کے ساتھ بارش کا امکان ہے، سکھر، لاڑکانہ، جیکب آباد، شہداد کوٹ، تھر، مٹھی، اسلام کوٹ میں بارش ہو سکتی ہے۔
دادو، جوہی، سیہون، نوابشاہ قاضی احمد، ہالہ، مٹیاری، حیدرآباد، جامشورو میں بھی بارش کا امکان ہے۔
کراچی میں آج بھی موسم گرم اور مرطوب رہے گا، محکمہ موسمیات کے مطابق آج شہر قائد میں دن کے وقت درجہ حرارت 38 ڈگری سینٹی تک رہنے کا امکان ہے، جو 50 ڈگری محسوس کیا جا سکے گا۔
