لاہور: کاہنہ میںکرائم کنٹرول ڈپارٹمنٹ (سی سی ڈی) پولیس سے مقابلے میں قتل ڈکیتی رہزنی اور لوٹ مار کی 78 سے زائد وارداتوں میں ملوث ڈاکوؤں کے گروہ کا سرغنہ شیرہلاک ہوگیا۔
تفصیلات کے مطابق لاہور میں کرائم کنٹرول ڈپارٹمنٹ (سی سی ڈی) ماڈل ٹاؤن اور ملزمان میں فائرنگ کا تبادلہ ہوا ، جس میں ساتھیوں کی فائرنگ سے ڈکیت گینگ کا سرغنہ شیر ہلاک ہوگیا۔
ترجمان سی سی ڈی نے بتایا کہ ملزم قتل، اقدام قتل اور پولیس مقابلے سمیت اٹھہتر سے زائد جرائم میں مطلوب تھا۔
ترجمان کا کہنا تھا کہ سی سی ڈی ٹیم نے خفیہ اطلاع پر تھانہ کاہنہ کی حدود میں اشتہاری کی گرفتاری کیلئے چھاپہ مارا، پولیس کے پہنچنے پر ملزم شیر اور اس کے ساتھیوں نے فائرنگ کر دی اور دوطرفہ فائرنگ میں ملزم شیر ساتھیوں کی گولی لگنے سے موقع پر ہلاک ہوگیا۔
سی سی ڈی نے کہا کہ ملزم نے 2021 میں تھانہ ہئیر کے علاقے میں ڈکیتی مزاحمت پر شہری کو قتل کیا اور 2023 میں نواب ٹاؤن میں ڈکیتی مزاحمت پر دکان مالک کو قتل کیا تھا۔
ترجمان کے مطابق ہلاک ملزم کے دیگر ساتھی فائرنگ کرتے ہوئے موقع سے فرار ہو گئے تاہم فرار ملزمان کی گرفتاری کے لیے علاقے میں سرچ آپریشن جاری ہے۔
