کراچی : بجلی کے ستائے شہریوں کا صبر جواب دے گیا، شہریوں کا کہنا ہے کہ روز 2 گھنٹے بجلی دے کر 6 گھنٹے بند کر دی جاتی ہے۔
تفصیلات کے مطابق کراچی میں لیاقت آباد سندھی ہوٹل اے ایریا کے مکینوں کا صبر جواب دے گیا ، بجلی کی طویل اور غیراعلانیہ لوڈشیڈنگ کیخلاف علاقہ مکینوں نے احتجاج کیا۔
مظاہرین نے سڑک پر ٹائر جلا کر ٹریفک معطل کردی ، جس سے گاڑیوں کی قطاریں لگ گئیں۔
مظاہرین کا کہنا تھا کہ شام 6 بجے سے بغیر کسی اطلاع کے علاقے کی بجلی بند ہے، روزانہ کامعمول ہے، 2 گھنٹے بجلی آتی ہےاور 6 گھنٹے لوڈشیڈنگ ہوتی ہے تاہم کئی گھنٹے احتجاج کے بعد مظاہرین منتشر ہوگئے۔
دوسری جانب ملیر 15 نیشنل ہائی وے پر بجلی کی عدم فراہمی پر احتجاج کرتے ہوئے مظاہرین نے قائد آباد آنے جانے والے دونوں ٹریک بند کردیے، احتجاج کے باعث ٹریفک جام ہوا اور گاڑیوں کی قطاریں لگ گئیں۔
اس حوالے سے ترجمان کے الیکٹرک نے کہا کہ لیاقت آباد اور ملیر 15 میں بجلی کی فراہمی معمول کےمطابق ہے، علاقائی فالٹس کو لوڈشیڈنگ سے تشبیہ دینا درست نہیں۔
ترجمان کا کہنا تھا کہ لوڈ شیڈنگ کا دورانیہ علاقے میں ہونیوالی بجلی چوری اور نقصانات کی شرح پر منحصر ہے، لوڈشیڈنگ کے الیکٹرک کی ویب سائٹ پر دیئے گئے شیڈول کے مطابق کی جاتی ہے، بجلی سے متعلق معلومات کیلئے کے الیکٹرک کے سوشل میڈیا پلیٹ فارمزپر رابطہ کریں۔
