لاہور : میڈیکل سپرنٹنڈنٹ کے عہدے کیلئے جعلی تجربہ اور جعلی ڈگریاں دینے کے انکشاف کے بعد 10 ڈاکٹرز کیخلاف کارروائی کا آغاز کردیا گیا۔
تفصیلات کے مطابق محکمہ صحت پنجاب نے جعلی ڈگریاں اور سرٹیفکیٹ دینے پر 10 ڈاکٹرز کیخلاف کارروائی شروع کردی۔
عزیز بھٹی اسپتال گجرات کے ایم ایس ڈاکٹر ایاز ناصر ، نشتر اسپتال ملتان کے ڈاکٹر حسنین رضا ،ڈاکٹر لبنیٰ ،ڈاکٹر رب نواز سے وضاحت طلب کی گئی ہے۔
اس کے علاوہ شاہدرہ اسپتال کے ڈاکٹر رضوان حبیب اورڈاکٹر شہروز خان ، قائداعظم کالج بہاولپورکی ڈاکٹر سمیرا ،ڈی ایچ کیو شیخوپورہ کی ڈاکٹر فائزہ ، ڈی ایچ اولاہورکےڈاکٹرزاہدمنیر اور میاں میر اسپتال کے ڈاکٹر حمید اللہ سے وضاحت مانگی گئی ہے۔
شوکاز میں کہا گیا ہے کہ میڈیکل سپرنٹنڈنٹ بننے کیلئے جعلی پبلک ہیلتھ ڈپلومہ تجربے میں دکھایا گیا۔
محکمہ صحت پنجاب نے 3 روز میں تمام ڈاکٹرز کو جواب جمع کرانے کا حکم دیتے ہوئے خبردار کیا ہے کہ جواب یاحقیقی تجربہ جمع نہ کرانے پرکارروائی کی جائے گی۔
