پاکستان کے نور زمان نے بہترین کارکردگی کا مظاہرہ کرتے ہوئے برٹش اوپن اسکواش کے مین راؤنڈ کے لیے کوالیفائی کرلیا۔
نور زمان نے کوالیفائیر کے فیصلہ کن میچ میں مصر کے کریم التورکی کو شکست دی، نور زمان نے کوالیفائنگ راؤنڈ کے تینوں میچز جیت کر مین راؤنڈ میں کوالیفائی کیا۔
زمان، 2022 کے بعد برٹش اوپن اسکواش کے مین راؤنڈ میں پہنچنے والے پہلے پاکستانی کھلاڑی ہیں، اتوار کو پہلے راؤنڈ میں انگلینڈ کے کرٹس ملک کا مقابلہ کریں گے۔
2022 میں، طیب اسلم ٹورنامنٹ کے مین ڈرا میں حصہ لینے والے آخری پاکستانی تھے۔
پاکستان کے پاس 30 برٹش اوپن ٹائٹلز کا ریکارڈ ہے جو کسی بھی ملک کا سب سے زیادہ ہے، ان میں سے 10 ٹائٹل پاکستان کے جانگیر خان نے جیتے ہیں۔
واضح رہے کہ گزشتہ ہفتے پاکستان کے نوجوان اسکواش پلئیر اشعب عرفان نے شاندار کارکردگی کا مظاہرہ کرتے ہوئے ساؤتھ آسٹریلین اسکواش چیمپئن شپ 2025 جیت لی۔
ایڈیلیڈ میں کھیلے گئے ایونٹ کے فائنل میں ملائیشیا کے ڈنکن لی کو پاکستانی کھلاڑی اشعب عرفان نے تین صفر سے آؤٹ کلاس کرکے ٹائٹل اپنے نام کرلیا۔
اشعب کی فتح کا اسکور گیارہ آٹھ، بارہ دس اور گیارہ نو رہا، اشعب عرفان نے سیمی فائنل میں ہم وطن حمزہ خان کو تین صفر سے ہرایا تھا اور ایونٹ میں ناقابل شکست رہے۔
ایڈیلیڈ میں کھیلے گئے ساؤتھ آسٹریلین اوپن اسکواش چیمپئن بننے پر اشعب کو مجموعی طور پر 9 ہزار ڈالرز کی انعامی رقم سے نوازا جائے گا۔
پاکستان کے نورزمان ورلڈ انڈر23 اسکواش چیمپئن بن گئے
اشعب کی یہ کامیابی نہ صرف ذاتی سطح پر ایک بڑا سنگ میل ہے بلکہ پاکستان کیلئے بھی فخر کا لمحہ ہے، جو ماضی میں اسکواش کے میدان میں عالمی شہرت رکھتا رہا ہے۔
