ریاض: سعودی عرب کی جانب سے اہم اعلان سامنے آیا ہے جس میں 14 ممالک کے شہریوں کے لیے ”بلاک ورک ویزا کوٹہ” کا اجرا جون 2025 تک کے لیے معطل کر دیا گیا ہے۔
غیر ملکی ذرائع ابلاغ کے مطابق متاثرہ ممالک میں مصر، بنگلہ دیش، انڈونیشیا، عراق، پاکستان، بھارت، نائیجیریا سمیت دیگر شامل ہیں۔
رپورٹس کے مطابق مملکت کی جانب سے یہ فیصلہ حج سیزن سے قبل امیگریشن کنٹرول، رش کی روک تھام اور غیر قانونی حج کو روکنے کے مقصد سے کیا گیا ہے۔
سعودی وزارتِ افرادی قوت کا کہنا ہے کہ 14 ممالک کے لیے بلاک ورک ویزے بند کیے گئے ہیں ان میں مصر، انڈونیشیا، عراق، نائیجیریا، پاکستان، بھارت، بنگلہ دیش، اردن، الجزائر، سوڈان، ایتھوپیا، تیونس، یمن، مراکش شامل ہیں۔
واضح رہے کہ بلاک ورک ویزا ایک ایسا کوٹہ ہوتا ہے جو سعودی کمپنیاں پہلے سے منظور کروا کر مخصوص ممالک سے ورکرز کو بلا سکتی ہیں۔
تاہم مملکت کی جانب سے پابندی عائد کیے جانے کے بعد نئی درخواستیں قبول نہیں کی جائیں گی۔ پرانی درخواستوں میں تاخیر یا رد ہو سکتا ہے۔ جن افراد کو ویزا ملا لیکن مملکت میں داخل نہیں ہوئے، وہ داخلے میں مشکلات کا سامنا کرسکتے ہیں۔
مملکت کی جانب سے یہ پابندیاں جون 2025 کے اختتام تک جاری رہیں گی، اور امکان ہے کہ حج سیزن کے بعد اس میں نرمی کردی جائے گی۔
دوسری جانب سعودی عرب میں جدہ ایئرپورٹ انتظامیہ کی جانب سے مملکت آنے والے مسافروں کو تنبیہ کی گئی ہے کہ مختلف نوعیت کی ممنوعہ اشیا اپنے ہمراہ نہ لائیں تاکہ کسی مشکل صورتحال سے دوچار نہ ہونا پڑے۔
جدہ ایئرپورٹ انتظامیہ کی جانب سے ممنوعہ اشیا کی فہرست جاری کی گئی ہے جن کی پابندی کرنا تمام مسافروں کے لیے بے حد ضروری ہے۔
رپورٹس کے مطابق جاری کی جانے والی ممنوعہ اشیا میں سرفہرست ہر قسم کی منشیات جن میں الحکول والے مشروبات بھی شامل ہیں۔ بجلی کا جھٹکا لگانے والی اشیا جن سے کرنٹ لگنے کا اندیشہ ہو۔
ایسے قلم اور نگاہ یا دھوپ میں استعمال ہونے والے چشمے جن میں حساس کیمرے لگے ہوں جنہیں غیرقانونی اور جاسوسی کے مقاصد کیلیے استعمال کیا جاتا ہے۔
سعودی عرب میں عیدالاضحیٰ کی تعطیلات کا اعلان کردیا گیا
ممنوعہ پوکر گیم جو جوئے وغیرہ میں استعمال ہوتا ہے۔ الیکٹرانک پائپ جس میں نشہ آورممنوعہ مواد اور مضر صحت خوشبو شامل ہو۔ دیگر ممنوعہ اشیا میں قیمتی دھاتیں اور خام سونا، غیراخلاقی سامان و اشیا مملکت میں لانا قطعی طورپر منع ہے۔
