وزیر داخلہ محسن نقوی نے عیدلاضحیٰ کے سلسلے میں ایکسپریس وے پر قائم مویشی منڈی کا دورہ کیا اس دوران سفید بیل ان کی توجہ کا مرکز رہا۔
اے آر وائی نیوز کے مطابق وزیر داخلہ محسن نقوی نے عیدالاضحیٰ کے سلسلے میں ایکسپریس وے پر قائم مویشی منڈی کا دورہ کیا اور اس میں بیوپاریوں اور خریداروں کو فراہم کردہ سہولتوںکا جائزہ لیا۔
محسن نقوی نے مویشی منڈی میں صفائی کے انتظامات بھی دیکھے اور ملک کے مختلف حصوں سے آئے بیوپاریوں سے ملاقات کر کے ان کے مسائل جاننے کی کوشش کی۔
انہوں نے بیوپاریوں کے مطالبے پر مویشی منڈی کے لیے جگہ وسیع کرنے، ملحقہ کراسنگ پل کی فوری مرمت، پارکنگ کے لیے ایریا مختص کرنے اور فی جانور فیس میں مناسب کمی کی ہدایت کی۔
محسن نقوی نے مویشی منڈی کے دوران وہاں فروخت کے لیے لائے گئے جانور بھی دیکھے اور ایک سفید بیل میں خصوصی دلچسپی لیتے ہوئے اس کی خوبصورتی کی تعریف کی۔
وزیر داخلہ کے استفسار پر بیل کجے مالک نے بتایا کہ اس بیل کا وزن 14 من سے زائد ہے اور وہ اس کی قیمت 18 لاکھ سے زائد طلب کر رہا ہے۔
