خیرپور لاڑکانہ روڈ پر انسداد دہشت گردی عدالت کے جج کے اسکواڈ پر نامعلوم دہشت گردوں نے حملہ کردیا، حملے میں ایک پولیس اہلکار شہید اور 2شدید زخمی ہوگئے۔
اےآر وائی نیوز خیر پور کے نمائندے نوید کھوڑو کے مطابق پولیس کا کہنا ہے کہ اے ٹی سی کے جج گاڑی میں سکھر سے لاڑکانہ جارہے تھے کہ اس دوران اسکواڈ میں شامل موبائل پر گولیاں لگیں۔
اچانک حملے کے نتیجے میں ایک اہلکار نے موقع پر ہی جان دے دی جبکہ دو اہلکار فائرنگ سے زخمی ہوئے، شہید اہلکار اور زخمیوں کو لاڑکانہ اسپتال منتقل کردیا گیا۔
خیرپور پولیس کے مطابق شہید ہونے والے اہلکار کی شناخت مقبول شیخ جبکہ زخمی ہونے والوں کے نام اقبال ملانو اور صغیر احمد ہیں۔
واقعے کی اطلاع ملتے ہی ایس ایس پی خیرپور سردار حسن نیازی بھاری پولیس نفری ہمراہ جائے وقوعہ پہنچ گئے ہیں۔ علاقے کی ناکہ بندی کرکے سرچ آپریشن کا آغاز کردیا گیا۔
پولیس کے مطابق واقعے کے بعد حملہ آور واردات کے فوری بعد فرار ہونے میں کامیاب ہوگئے، شہید اور زخمی اہلکاروں کا تعلق ضلع لاڑکانہ سے ہے۔
ایس ایس پی خیرپور سردار حسن نیازی نے میڈیا کو بتایا ہے کہ اے ٹی سی جج محفوظ ہیں، ان کے اسکواڈ پرحملہ ہوا ہے، یہ ٹارگٹڈ حملہ تھا یا ڈکیتی کے دوران کچھ ہوا؟ اس معاملے کی مزید تحقیقات کررہے ہیں۔
