قومی کرکٹ ٹیم کے فاسٹ باؤلر حارث رؤف نے کہا ہے کہ ہمارے بیٹرز ماڈرن ڈے کرکٹ کھیل رہے ہیں، مجھ سمیت ہر باؤلر کی کوشش ہوتی ہے کہ کم سے کم رنز دے۔
یہ بات انہوں نے لاہور میں پریس کانفرنس سے خطاب کرتے ہوئے کہی، پاکستان کے فاسٹ بولر حارث رؤف نے بنگلادیش کے خلاف دوسرے ٹی ٹوئنٹی میں کامیابی کے بعد کہا کہ آج پوری ٹیم بہت اچھا کھیلی۔
ان کا کہنا تھا کہ ہمارے بیٹرز ماڈرن ڈے کرکٹ کھیل رہے ہیں، بولرز کی بھی یہی کوشش ہوتی ہے کہ وہ اپنے اوورز میں کم سے کم رنز دیں۔
حارث رؤف نے کہا کہ نسیم شاہ اور شاہین آفریدی کے ساتھ کافی بالنگ کرچکا ہوں، فاسٹ بولرز کے لیے روٹیشن پالیسی بہت ضروری ہوتی ہے۔
انہوں نے بتایا کہ ماڈرن ڈے کرکٹ میں فاسٹ بولرز نے کیا کرنا ہوتا ہے وہ ان کو بہتر پتہ ہے، کوئی بھی بولر یہ نہیں چاہتا کہ اس کو زیادہ رنز پڑیں، میری بھی کوشش ہوتی ہے کہ کم سے کم رنز دوں۔
ایک سوال کے جواب میں حارث رؤف نے بتایا کہ آج کل کی کرکٹ بلے بازوں کے لیے زیادہ سپورٹیو ہے، میں تینوں فارمیٹ کا باؤلر ہوں، مجھ سے متعلق باتیں کی جاتی ہیں کہ ریڈ بال کرکٹ نہیں کھیلنا چاہتا۔
ان کا کہنا تھا کہ مجھ سے متعلق باتیں کی جاتی ہیں کہ ریڈ بال کرکٹ نہیں کھیلنا چاہتا، صاحبزادہ فرحان بہترین فارم میں ہے اس کے لیے نیک تمنائیں ہیں، گزشتہ کچھ سالوں سے مینجمنٹ، کوچز اور کپتان بار بار تبدیل ہوتے رہے اس سے ٹیم ڈسٹرب ہوتی ہے۔
انہوں نے مزید کہا کہ دنیا کی تمام ٹیمیں اپنے اہم بولرز کو آرام کراتی ہیں، ہمیں اس چیز کو ماننا پڑے گا کہ ہم نے اپنی بینچ اسٹرینتھ کو تیار نہیں کیا۔
