کراچی: شہر قائد میں رات گئے تیز رفتار گاڑیوں کی ٹکر سے 4 موٹر سائیکل سوار جان سے گئے۔
تفصیلات کے مطابق کراچی کے علاقے کلفٹن تین تلوار چوک پر تیز رفتار ڈبل کیبن کی ٹکر سے موٹر سائیکل سوار ایک ڈیلیوری بوائے جاں بحق ہو گیا، حادثے کے ذمہ دار ڈبل کیبن ڈرائیور عثمان شاہ راشدی کو پولیس نے گرفتار کر کے درخشاں تھانے منتقل کر دیا۔
ڈی آئی جی ساؤتھ اسد رضا کے مطابق موٹرسائیکل سوار ڈیلیوری بوائے کی شناخت مرتضیٰ کے نام سے ہوئی ہے جو حادثے کے بعد موقع ہی پر جاں بحق ہو گیا تھا، جب کہ گرفتار ڈرائیور عثمان شاہ راشدی سابق ڈی آئی جی پیر حسن شاہ راشدی کا پوتا ہے۔
کراچی کے علاقے شارع فیصل کار ساز پر بھی ایک تیز رفتار کار کی ٹکر سے موٹر سائیکل سوار جاں بحق اور ان کے ساتھ موجود خاتون زخمی ہو گئیں، حادثہ تیز رفتاری کے باعث پیش آیا، ریسکیو حکام کے مطابق حادثے کا ذمہ دار ڈرائیور کار سمیت فرار ہو گیا، جب کہ جاں بحق شہری اور زخمی خاتون کو اسپتال منتقل کر دیا گیا ہے۔ جاں بحق شہری کی شناخت محمد شمعون، زخمی خاتون کی انجم کے نام سے ہوئی ہے۔
خیرپور : جج کے اسکواڈ پر حملہ، پولیس اہلکار شہید 2 زخمی
قیوم آباد جام صادق پل پر بھی ایک تیز رفتار گاڑی کی ٹکر سے موٹر سائیکل سوار اپنی قیمتی جان سے ہاتھ دھو بیٹھا، ریسکیو حکام کے مطابق 25 سالہ نوجوان کی شناخت نہیں ہو سکی، اور اس کی لاش اسپتال منتقل کر دی گئی ہے۔
ادھر بلدیہ 2 نمبر کے قریب بھی گاڑی کی ٹکر سے ایک موٹر سائیکل سوار جاں بحق ہو گیا ہے۔
