لاہور : وزیراعلیٰ پنجاب مریم نواز نے ہاؤسنگ سوسائٹی کی رجسٹریشن کیلئے غیر ضروری این او سی ختم کرنے کا حکم دے دیا۔
تفصیلات کے مطابق وزیراعلیٰ پنجاب مریم نواز کی زیرصدارت خصوصی اجلاس ہوا، جس میں غیر قانونی ہاؤسنگ سوسائٹیز کو ریگولرائز کرنے کے میکانزم پر غور کیا گیا۔
مریم نواز نے ہاؤسنگ سوسائٹی کی رجسٹریشن کیلئےغیر ضروری این او سی ختم کرنے کا حکم دے دیا۔
اجلاس میں غیر قانونی ہاؤسنگ اسکیموں کی ریگولرائزیشن کے لئے اعلیٰ سطح کمیٹی بنانے پر اتفاق ہوا۔
اس کے علاوہ پنجاب میں پہلی مرتبہ ہاؤسنگ سیکٹر کو ڈیجیٹلائز کرنے کا فیصلہ کیا گیا ہے، ہاؤسنگ سوسائٹی مینجمنٹ سسٹم متعارف کرایا جائے گا۔
مزید پڑھیں : ہاؤسنگ منصوبوں میں سرمایہ کاری کرنے والے ہوشیار ہوجائیں!
ہاؤسنگ سوسائٹی کی منظوری، مینجمنٹ اور ٹرانسفر آن لائن ہوسکے گی جبکہ ڈاکیومنٹس اپ لوڈ کرنے کے بعد این او سی فیسیں بھی آن لائن ادا ہوں گی اور ہاؤسنگ سوسائٹی مینجمنٹ سسٹم کے ذریعے ڈویلپمنٹ اور مینجمنٹ بھی ممکن ہوگی۔
عوام کے لئے پلاٹ کی خرید وفروخت کو ہر طرح سے محفوظ بنانے کا فیصلہ کیا گیا ہے ، مریم نواز نے کہا کہ غریب لوگوں سے پیسے لے لئے جاتے ہیں اورپلاٹ نہیں ملتے، غیر قانونی ہاؤسنگ سوسائٹی کے قیام میں سرکاری محکمے بھی برابر کے ذمہ دار ہیں۔
وزیراعلیٰ پنجاب کا کہنا تھا کہ ملی بھگت سے غیر قانونی ہاؤسنگ اسکیمیں قائم ہوئی، سز اخریدنے والے عام آدمی کو ملی، غیر قانونی ہاوسنگ سوسائٹی بن رہی تھیں تو متعلقہ اداروں نے آنکھیں کیوں بند کررکھی تھیں؟ جو ہاؤسنگ اسکیمیں بن چکی ہیں قانون کے مطابق ان کا مسئلہ حل ہونا چاہیے ، قواعد و ضوابط کے مطابق ہاؤسنگ اسکیموں کوایک مرتبہ ایمنسٹی پر غور کرنا ہوگا۔
