کراچی : سی ای او کے الیکٹرک مونس علوی نے کراچی میں لوڈ شیڈنگ صفر کرنے کا فارمولا دے دیا اور300 فیڈرز پر بجلی چوری کو لوڈشیڈنگ کی بڑی وجہ قرار دیا۔
تفصیلات کے مطابق سی ای او کے الیکٹرک مونس علوی نے 300 فیڈرز پر بجلی چوری کو کراچی میں لوڈشیڈنگ کی بڑی وجہ قرار دے دیا۔
سی ای او کے ای کا کہنا تھا کہ کراچی میں 2129 فیڈرز میں 300 پر 87 فیصد کی چوری اور نقصان ہے، 300 فیڈرز پر بجلی چوری اور نقصان کراچی میں لوڈ شیڈنگ کی بڑی وجہ ہے۔
انھوں نے بتایا کہ حکومت ہم سے 300 فیڈرز لے لے تو کراچی کو لوڈ شیڈنگ فری کرسکتےہیں ، 300 فیڈرز پر بجلی دینے کو تیار ہیں، حکومت ہمیں اس کی ریکوری کر دے۔
مونس علوی نے کہا کہ کراچی میں 70 فیصد علاقے لوڈ شیڈنگ سے مستثنیٰ ہیں، کے الیکٹرک کے ملٹی ایئرٹیرف سےعام صارف متاثر نہیں ہوگا، ملٹی ایئرٹیرف پر عملدرآمد سے 2030 تک کراچی کو 90 فیصد تک لوڈشیڈنگ فری کیا جائے گا، 2030 تک شہرمیں صارفین کی تعداد 50 لاکھ، بجلی کی ترسیل 5 ہزار میگاواٹ تک پہنچ جائے گی۔
مزید پڑھیں : کراچی میں بدترین لوڈشیڈنگ ، کے الیکٹرک کا 70 فیصد حصہ لوڈشیڈنگ فری ہونے کا دعویٰ
سی ای او کے ای نے مزید بتایا کہ فیڈر سے بجلی چوری کی روک تھام کے لئے نئی ٹیکنالوجی متعارف کرانے پر کام کررہے ہیں، نئے سسٹم میں پی ایم ٹی کو چھیڑا گیا تو فنی خرابی درست کرنے میں 3دن لگ سکتے ہیں۔
ان کا کہنا تھا کہ حکومت کو پیشکش کی ہے، بجلی چوری والے علاقوں میں اندرون نظام چلانے میں معاونت کرے، کیپٹوپاور پر چلنے والی صنعتوں کو گرڈ سے منسلک کر کے بجلی دینے کو تیار ہیں۔
کے الیکٹرک سی ای او نے کہا کہ معاشی صنعتی سرگرمی بڑھنے سے کراچی میں بجلی کی طلب میں اضافہ دیکھنے میں آیا ہے، کے ای اس وقت شہر میں 4500 میگاواٹ بجلی فراہم کرنے کی صلاحیت رکھتی ہے۔
