راولپنڈی : بانی پی ٹی آئی نے حکومت کیخلاف احتجاجی تحریک شروع کرنے کا اعلان کر دیا۔

تفصیلات کے مطابق سینیٹرعلی ظفر نے میڈیا سے گفتگو کرتے ہوئے کہا کہ بانی پی ٹی آئی نےحکومت کیخلاف احتجاجی تحریک شروع کرنے کا اعلان کر دیا ہے ، احتجاجی تحریک کا مرکز اسلام آباد نہیں ہوگا، ملک بھر میں احتجاجی تحریک چلائیں گے۔

علی ظفر کا کہنا تھا کہ بانی پی ٹی آئی نے کہا ہمیں دیوار سے لگایا گیا،اب کوئی راستہ نہیں بچا، ہمارے پاس سڑکوں پر آنے کے علاوہ کوئی آپشن نہیں بچا۔

انھوں نے بتایا کہ بانی پی ٹی آئی نےکہااحتجاجی تحریک سے متعلق تمام ہدایات جیل سے دوں گا، بانی نے مجھے ذمہ داری دی کہ احتجاجی تحریک کا پلان بنا کر دوں، بانی سے آئندہ ملاقات پر احتجاج تحریک کا پلان پیش کروں گا۔

مزید پڑھیں : عید سے پہلے رہائی کی خبریں ، بانی پی آئی کے وکیل کا اہم بیان آگیا

رہنما پی ٹی آئی نے کہا کہ عمران خان بہت سنجیدہ ہیں اب جوتحریک چلے گی ایسی پہلے کبھی نہیں چلی ہو گی، تحریک چلانے میں رکاوٹیں آتی ہیں لیکن ہمیں بھی طریقے آتے ہیں۔

ان کا مزید کہنا تھا کہ چند دنوں میں احتجاجی تحریک کی حکمت عملی تیار ہو جائے گی، عمران خان نے کہا کوئی آپشن نہیں چھوڑا گیا، اس سے زیادہ دیوار کیساتھ نہیں لگ سکتے، 5 جون کو سماعت ہوتی ہے یا نہیں سوالیہ نشان ہے، لیکن امید ہے ریلیف ملے گا۔