وزیراعظم کے مشیر برائے سیاسی امور رانا ثنا اللہ کا کہنا ہے کہ عمران خان میں یہ صلاحیت ہے کہ وہ اپنے مخالف کو مخالفت میں پوری طرح سے تگڑا کردیتے ہیں۔
اے آر وائی نیوز سے خصوصی گفتگو کرتے ہوئے مشیر وزیراعظم رانا ثنا اللہ نے کہا کہ قاضی فائز عیسیٰ کو بھی عمران خان نے اس انتہا پر پہنچا دیا کہ پھر جو ان سے ہوسکتا تھا وہ انہوں نے کیا ہے۔
انہوں نے کہا کہ عمران خان اسٹیبلشمنٹ کی لیڈر شپ کے خلاف جہاں تک پہنچے ہیں اس کے بعد گنجائش بڑی کم رہ جاتی ہے۔
ایک سوال کے جواب میں رانا ثنا نے کہا کہ عمران خان کا جیل سے باہر آنا بڑا مشکل ہے اگلے دو تین سالوں میں باہر آنا مجھے نظر نہیں آرہا، کچھ کیسز میں سزا ہوچکی ہے اور کچھ میں ہوجائے گی۔
انہوں نے کہا کہ اس وقت تو عمران خان اپنی سوچ سے کامیابی سے بہت دور ہیں، وہ اقتدار چاہتے ہیں تاکہ پھر سے میں نہیں چھوڑوں گا شروع کردیں، ان کا فلسفہ ہے کہ وہ مخالف کو فریق نہیں دشمن سمجھتے ہیں۔
رانا ثنا اللہ نے کہا کہ ہاں ایک راستہ کھلا ہے کہ بانی پی ٹی آئی سیاست دانوں سے بات کریں، وہ اسٹیبلشمنٹ کے بجائے نواز شریف اور زرداری سے بات کا پیغام بھیجیں۔انہیں سمجھنا چاہیے اختیار بہرحال حکومت کا ہی ہے اور حکومت سے ہی بات کرنی ہے۔
پی ٹی آئی رہنماوں کے بیانات کے حوالے سے ان کا کہنا تھا کہ پی ٹی آئی والے ہر چیز کا ذمہ دار ہمیں ٹھہراتے ہیں اور پھر کہتے ہیں آپ کے پاس اختیارنہیں، بانی پی ٹی آئی میں صلاحیت ہے ، وہ اپنے مخالف کو اپنی مخالفت میں پوری طرح تگڑا کر دیتے ہیں۔
