دبنگ اور شیر نامی 35 من وزنی بچھڑے کی دھوم مچ گئی، ڈاکخانہ بازار کی تاجر فیملی خوبصورت جانور پال کر اللہ کی راہ میں قربان کرتی ہے۔
اے آر وائی نیوز کے مطابق دبنگ اور شیر نام خوبصورت اور دیوہیکل بچھڑے کو مکھن، دیسی گھی، بادام سمیت کئی طرح کی صحت بخش غذائیں کھلائی جاتی ہیں، عام جانور کی طرح یہ بچھڑا جگالی بھی کرتا ہے تاہم یہ نوبت اس کے دیسی کھانوں کی وجہ سے کم ہی آتی ہے۔
مالک نے بتایا کہ اس کا نام بچوں نے دبنگ رکھا ہوا ہے، اس کو سردیوں میں مکھن دیتے ہیں، دیسی گھی دیتے ہیں، دودھ دیتے ہیں اور چارہ بھی دیتے ہیں، اس وزن الحمداللہ تقریباً 35 من ہے، یہ ہم نے بڑے شوق سے پالا ہے۔
انھوں نے کہا کہ یہ ہماری گائے کا بچھڑا ہے، ہم اسے اللہ کے رستے میں قربان کریں گے، بچوں کو تو دکھ ہوتا ہی ہوتا ہے، ہمیں بھی ہوتا ہے۔
اس کے علاوہ کئی جانوروں کے ساتھ تاجر فیملی نے دو بکرے ببلو اور مکھن بھی پالے ہوئے ہیں جو چاکلیٹ، چپس کھانے کے ساتھ ساتھ سافٹ ڈرنکس بھی پیتے ہیں۔
وہاں موجود بچے نے بتایا کہ ہم جو بھی چیزیں کھاتے ہیں، پاپڑ وغیرہ یہ ہمارے ساتھ کھاتا ہے، ہمارے ساتھ بوتل پیتا ہے، ہم اسے بادام، پستے اور کاجو کھلاتے ہیں جب یہ ذبح ہوگا تو ہمیں بہت زیاد یاد آئے گا۔
رپورٹ: ملک نعیم وفا
