کراچی : اورنگی ٹاؤن میں خونی مسافر بس نے بچی کو کچل دیا، دو سالہ ایمان نے موقع پر ہی دم توڑ دیا، ڈرائیور اور کنڈیکٹر فرار ہوگئے۔
اے آر وائی نیوز کی رپورٹ کے مطابق کراچی کے علاقے اورنگی ٹاؤن10نمبر کے قریب مسافر بس کے نیچے آکر کچلی جانے والی 2 سال کی ایمان کی لاش عباسی شہید اسپتال منتقل کردی گئی۔
اس حوالے سے پولیس حکام کا کہنا ہے کہ حادثہ اورنگی ٹاؤن منگل بازار کی پرہجوم سڑک پر پیش آیا، دو سالہ بچی قریبی مکان کی رہائشی تھی، کھیلتے ہوئی گھر سے باہر سڑک پر آگئی۔
پولیس کے مطابق 2سال کی بچی سڑک سے گزرنے والی منی بس کے نیچے آگئی، بس ڈرائیور اور کنڈیکٹر موقع سے فرار ہوگئے، مذکورہ بس تحویل میں لے کر ڈرائیور اور کنڈیکٹر کو تلاش کیا جارہا ہے۔
علاوہ ازیں کراچی میں تین تلوار کے قریب کار کی موٹر سائیکل کو ٹکر کے نتیجے میں ایک شخص جاں بحق اور ایک زخمی ہوا، پولیس نے کار سوار شخص کو گرفتار کرلیا۔
ڈیفنس خیابان نشاط پر ڈبل کیبن گاڑی نے موٹر سائیکل کو ٹکر ماردی جس سے آن لائن فوڈ ڈلیوری کمپنی کا رائیڈر مرتضٰی موقع پر ہی جاں بحق ہوگیا، پولیس نے ملزم ڈرائیور کو گرفتارکرلیا۔
شارع فیصل کارساز کے قریب نامعلوم گاڑی کی زد میں آکر ماں شدید زخمی جب کہ اس کا بیٹا جاں بحق ہوگیا جبکہ قیوم آباد جام صادق پل پر بھی نامعلوم گاڑی کی ٹکر سے موٹر سائیکل سوار جاں بحق ہوگیا۔
