نیویارک: پاکستان پیپلز پارٹی کے چیئرمین بلاول بھٹو زرداری وفد کے ساتھ نیویارک پہنچ گئے ہیں۔
بلاول بھٹو امریکا میں پاکستانی پارلیمانی وفد کی قیادت کر رہے ہیں، جس میں حنا ربانی کھر، مصدق ملک، خرم دستگیر، بشریٰ انجم بٹ، تہمینہ جنجوعہ، جلیل عباس جیلانی شامل ہیں، جب کہ شیری رحمان سمیت وفد کے دیگر اراکین کل نیویارک پہنچیں گے۔
بلاول بھٹو کی قیادت میں پاکستانی پارلیمانی وفد امریکا میں اہم ملاقاتیں کرے گا، اس دورے کا مقصد دنیا کو بھارتی جارحیت سے آگاہ کرنا ہے، وفد اقوام متحدہ کے سیکریٹری جنرل سے بھی ملاقات کرے گا۔
پاکستانی حکومت کے نمائندے آئندہ ہفتے آ رہے ہیں، ٹرمپ
پارلیمانی وفد اقوام متحدہ کی جنرل اسمبلی کے صدر، اور سلامتی کونسل کے مستقل اور غیر مستقل اراکین سے بھی ملاقاتیں کرے گا، وفد کی جانب سے اقوام متحدہ کی کوریج کرنے والے صحافیوں کو بریفنگ دی جائے گی۔
پاکستانی پارلیمانی وفد منگل کی رات واشنگٹن ڈی سی پہنچے گا، جہاں کانگریس اراکین سے ملاقاتیں ہوں گی، پارلیمانی وفد کی امریکی محکمہ خارجہ کے اہلکاروں سے ملاقات طے ہو چکی ہے، ٹرمپ انتظامیہ کے اہم اراکین سے بھی ملاقاتیں کی جائیں گی، اور وفد کی جانب سے امریکی صحافیوں کو بھی بریفنگ دی جائے گی۔
یاد رہے کہ امریکی صدر ڈونلڈ ٹرمپ نے جمعہ کو جوائنٹ بیس اینڈریو پر میڈیا سے گفتگو کرتے ہوئے یہ اطلاع دی تھی کہ حکومت پاکستان کا ایک وفد آئندہ ہفتے واشنگٹن آ رہا ہے۔ روئٹرز کے مطابق اس دورے میں پاکستان کی جانب سے ٹیرف پر معاہدہ کیا جائے گا، پاکستان کو امریکا کے ساتھ 3 بلین ڈالر کے تجارتی سرپلس کی وجہ سے امریکا کو اپنی برآمدات پر ممکنہ 29 فی صد ٹیرف کا سامنا ہے۔
