سیالکوٹ: پنجاب اسمبلی کے حلقہ پی پی 52 سیالکوٹ میں ضمنی اتنخاب کے لیے ووٹنگ جاری ہے۔

تفصیلات کے مطابق سیالکوٹ کے حلقہ پی پی 52 میں ضمنی انتخاب کے لیے ووٹنگ آج صبح 8 بجے سے جاری ہے، اس نشست پر ن لیگ، پی ٹی آئی، پی پی رہنماؤں سمیت 14 امیدوار میدان میں ہیں۔

انتخابی حلقے میں سمبڑیال اور ڈسکہ کی 18 یونین کونسلیں شامل ہیں، نون لیگ اور پی ٹی آئی میں کانٹے کا مقابلہ ہونے کا امکان ہے، تینوں بڑی جماعتوں نے انتخابی مہم میں بڑے جلسے کیے۔

سیاسی قائدین بھی اپنے امیدواروں کی انتخابی مہم میں شریک رہے، حلقے کے ووٹرز کی بھرپور دل چسپی کے باعث عام انتخابات جیسا ماحول تھا، یہ نشست مسلم لیگ ن کے رکن پنجاب اسمبلی ارشد وڑائچ کے انتقال کے باعث خالی ہوئی ہے، جن کی بیٹی حنا ارشد وڑائچ مسلم لیگ ن کی امیدوار ہیں۔

حنا ارشد کے مدمقابل پاکستان پیپلز پارٹی کے کامران زاہد چیمہ الیکشن لڑ رہے ہیں، تحریک انصاف کے امیدوار فاخر نشاط بھی میدان میں موجود ہیں۔