لاہور: عید الاضحیٰ کے سلسلے میں پنجاب پولیس نے سیکیورٹی انتظامات مکمل کرلیے، سکیورٹی کیلئے ہزاروں اہلکار فرائض انجام دیں گے۔
تفصیلات کے مطابق آئی جی پنجاب ڈاکٹر عثمان انور نے عیدالاضحیٰ پر سیکیورٹی ہائی الرٹ رکھنے کا حکم دیدیا ہے، عید کے موقعے پر مساجد، امام بارگاہوں، عید اجتماعات کیلئے تیاری مکمل کرلی گئی ہے۔
آئی جی پنجاب کا کہنا ہے کہ موجودہ صورتحال کے پیش نظر پنجاب بھر میں سیکیورٹی بڑھا دی جائے گی، عید تعطیلات پر پارکس، تفریحی مقامات کی سیکیورٹی کیلئے نفری تعینات کی جائے، ون ویلنگ، ہوائی فائرنگ، پتنگ بازی، ہلڑ بازی برداشت نہیں کی جائیگی۔
ڈاکٹر عثمان انور نے مزید کہا کہ عید الاضحیٰ پر ٹریفک روانی کیلئے متعلقہ پوائنٹس پر اضافی نفری تعینات کی جائے، مری میں گاڑیوں کے داخلے، اخراج کیلئے ایس او پیز پر عمل درآمد کیا جائے۔
پنجاب پولیس کے مطابق پنجاب میں سیکیورٹی کیلئے 43 ہزار سے زائد افسران، اہلکار فرائض انجام دینگے، 445 کوئیک رسپانس فورس ٹیمیں بھی تعینات ہونگی، 11912 میٹل ڈکٹیٹرز، 225 واک تھرو گیٹس، 10466کیمرے استعمال ہونگے۔
ترجمان کے مطابق لاہور میں 5 ہزار سے زائد نماز عید اجتماعات کیلئے 8 ہزار سے زائد اہلکار، افسران تعینات ہونگے۔
