ڈی جی خان پولیس نے کوٹ مبارک میں مقابلے کے دوران 4 دہشت گردوں کو ہلاک کردیا، دہشتگرد شہریوں کو خوف و ہراس میں مبتلا کررہے تھے۔
اے آر وائی نیوز کے مطابق پنجاب پولیس نے بتایا کہ مقابلے کے دوران 4 دہشت گرد مارے گئے جبکہ دیگر دہشت گرد جھاڑیوں، ٹیلوں کی آڑ میں فرار ہوگئے، پولیس نے ہلاک دہشت گردوں کے قبضے سے اسلحہ، گولہ بارود بھی برآمد کیا ہے۔
پنجاب پولیس نے بتایا کہ پنجاب، کے پی سرحدی علاقے میں خارجی دہشت گردوں کی نقل و حرکت کی اطلاع ملی تھی، دہشت گرد مختلف مقامات پر شہریوں کو خوف و ہراس میں مبتلا کررہے تھے۔
حکام نے بتایا کہ اطلاع ملتے ہی پولیس ٹیموں نے فوری علاقے کا محاصرہ کرکے آپریشن کا آغاز کیا، خارجی دہشت گرد بھاری اسلحہ کےساتھ پولیس ٹیموں پر حملہ آور ہوئے
پنجاب پولیس نے بتایا کہ موثر کارروائی کرتے ہوئے دہشتگردوں کے مذموم عزائم کو خاک میں ملادیا، پولیس کی جانب سے فرار دہشتگردوں کے خاتمے کیلئے علاقے میں سرچ آپریشن جاری ہے۔
دریں اثنا وزیراعظم نے ڈی جی خان میں فتنہ الخوارج کیخلاف کارروائی پر پولیس کی پذیرائی کی، شہباز شریف نے کہا کہ کوٹ مبارک میں کارروائی کے دوران 4 خارجی جہنم رسید کیے گئے۔
وزیراعظم نے کہا کہ پولیس نے پیشہ ورانہ صلاحیتوں سے ناپاک عزائم خاک میں ملائے، دہشتگردی کے خاتمے تک جنگ جاری رہےگی، پوری قوم دہشتگردی کیخلاف متحد ہے۔
