پشاور: وزیراعظم شہباز شریف کا کہنا ہے کہ بھارت نے مزید کوئی حرکت کی تو اسے دوبارہ سبق سکھائیں گے۔
پشاور میں منعقدہ جرگے میں وزیراعظم شہباز شریف، فیلڈ مارشل عاصم منیرم گورنر فیصل کریم کنڈی اور وزیر اعلیٰ علی امین گنڈا پور نے شرکت کی۔
وزیراعظم نے خطاب کرتے ہوئے کہا کہ دشمن نے پاکستان پر حملہ کیا بے گناہ لوگوں کو شہید کیا، عوام نے مسلح افواج کے لیے تہجد کے وقت دعائیں مانگیں، فیلڈ مارشل کی قیادت میں پاکستان نے دشمن کو زندگی بھر کا سبق سکھایا ہے۔
شہباز شریف نے کہا کہ میں سمجھتا ہوں مسلح افواج نے جو سبق دیا بھارت زندگی بھر نہیں بھولے گا، ترقی و خوشحالی کے میدان میں بھی پاکستان کی قوم عظیم بن کر ابھرے گی، سندھ طاس معاہدے پر بھارت دن رات پانی بند کرنے کی دھمکیاں دیتا ہے۔
انہوں نے کہا کہ سندھ طاس معاہدے پر بھارت دن رات پانی بند کرنے کی دھمکیاں دیتا ہے، پانی کے مسئلے پر چاروں صوبوں کے ساتھ مل بیٹھ کر فیصلہ کرنا ہے، سندھ طاس معاہدے کے تحت پانی کے ایک ایک قطرے پر پاکستان کا حق ہے۔
علاوہ ازیں وزیراعظم نے کہا کہ علی امین گنڈاپور نے کہا کہ این ایف سی کو 15 سال ہوگئے اس پر نظرثانی کرنا ہوگی، ڈیڑھ ماہ پہلے اس پر کمیٹی بنائی اور این ایف سی پر غور کیا گیا، پہلی میٹنگ این ایف سی کی اگست میں بلائیں گے۔
شہباز شریف کا کہنا تھا کہ 2010 مٰں این ایف سی ایوارڈ میں پہلا ایجنڈا کے پی میں دہشت گردی سے متعلق ہے، این ایف سی میں دہشت گردی سے نمٹنے کے لیے ایک فیصد پر تمام صوبوں نے اتفاق کیا ہے، دہشتگردی کے خاتمے تک این ایف سی کا یہ فنڈ جاری رہے گا۔
انہوں نے کہا کہ کے پی آج بھی دہشت گردی کے خلاف فرنٹ لائن پر کردار ادا کررہا ہے، وفاق کے پاس جو بھی وسائل ہیں وہ پاکستان بھر کے وسائل ہیں، ان وسائل میں کے پی، سندھ، پنجاب، بلوچستان، اے جے کے، جی بی کا حصہ ہے، این ایف سی ایوارڈ سے متعلق کے پی حکومت کے مسائل کو مل بیٹھ کر حل کریں گے۔
