کراچی کے علاقے فیڈرل بی ایریا بلاک 18 میں بپھرا بیل شہری کو گھسیٹتا ہوا لے گیا جس کی ویڈیو منظرعام پر آگئی۔
عید قرباں کی آمد آمد ہے ایسے میں شہری سنت ابراہیمی پر عمل پیرا ہونے کے لیے جانوروں کی خریداری میں مصروف ہیں۔
ایسے میں اکثر و بیشتر ویڈیوز سوشل میڈیا پر وائرل ہوجاتی ہیں کہیں جانور بھاگ جاتا ہے کہیں جانور تنگ کرنے پر شہری کو ٹکر بھی مار بھی دیتا ہے۔
تاہم سوشل میڈیا پر ایک ایسی ہی ویڈیو تیزی سے وائرل ہورہی ہے جسے دیکھ کر لوگ حیران رہ گئے۔
کراچی کے علاقے فیڈرل بی ایریا بلاک 18 میں بیل کی رسی نوجوان کے پیر میں پھنسی اور بیل اسے گھسیٹتا ہوا دور تک لے گیا جس کے نتیجے میں وہ زخمی ہوگیا۔
ویڈیو میں دیکھا جاسکتا ہے کہ بیل نوجوان کو گھسیٹتا ہوا لے جارہا ہے جبکہ نوجوان مدد کے لیے لوگوں کو پکار رہا ہے۔
آخر میں بیل چبوترے سے ٹکرانے کے بعد رک گیا تو نوجوان کی جان بچی۔
بیل کی جانب سے گھسیٹے جانے کے نتیجے میں نوجوان زخمی ہوگیا جسے اسپتال میں طبی امداد فراہم کی جارہی ہے۔
