وفاقی تحقیقاتی ادارے (ایف آئی اے) نے عمرہ ویزہ کی آڑ میں گداگر سعودی عرب اسمگل کرنے میں ملوث ملزم کو گرفتار کیا ہے۔
اے آر وائی نیوز کے مطابق وفاقی تحقیقاتی ادارے ایف آئی اے نے اسلام آباد میں کامیاب کارروائی کرتے ہوئے عمرہ ویزہ کی آڑ میں انسانی اسمگلنگ میں ملوث ملزم کو گرفتار کر لیا ہے۔
ترجمان ایف آئی اے کے مطابق ملزم سردار محمد عادل کو اسلام آباد میں ایک کامیاب چھاپہ مار کارروائی میں گرفتار کیا گیا۔ ملزم انسانی اسمگلنگ میں ملوث تھا اور عمرہ ویزہ کی آڑ میں سعودی عرب بھجواتا تھا۔
ایف آئی اے کے مطابق تحقیقات میں گرفتار ملزم نے سنسنی خیز انکشافات کیے ہیں۔ جب کہ ملزم کے ساتھیوں کی گرفتاری کے لیے کوششیں جاری ہیں۔
ملزم نے بتایا ہے کہ اس نے نوکری کا جھانسہ دے کر خواتین کو عمرہ ویزے پر سعودی عرب بھجوایا جو وہاں جا کر مبینہ طور پر گداگری کرنے لگیں۔
ایف آئی اے کے مطابق ویزہ معیاد ختم ہونے کے باوجود خواتین نے 10 ماہ تک سعودی عرب میں قیام کیا۔ سعودی حکومت نے مذکورہ خواتین کو واپس پاکستان ڈی پورٹ کیا، جن کی نشاندہی پر ملزم سردار محمد اقبال کو گرفتار کیا گیا۔
واضح رہے کہ سعودی عرب میں گداگری قانونی طور پر جرم ہے اور ماضی میں سینکڑوں گداگروں کو پاکستان ڈی پورٹ کیا جاتا رہا ہے۔
گزشتہ روز سینیٹ کی قائمہ کمیٹی برائے اوورسیز پاکستانیز کے اجلاس میں اوورسیز پاکستانی حکام نے بتایا کہ سعودی عرب نےپاکستانیوں کےویزےکم کردیےہیں کیونکہ بہت سے پاکستانی بھیک مانگتے پکڑے گئے ہیں، اس لئے ویزے کے حصول کیلئے کوائف سخت کردیے گئے ہیں۔
