اسلام آباد : دفتر خارجہ نے 2 پاکستانی شہریوں کی ایران میں ہلاکت کی تصدیق کردی اور کہا میتوں کی جلد وطن واپسی کیلئے قانونی تقاضے پورے کیے جارہے ہیں۔
تفصیلات کے مطابق ترجمان دفتر خارجہ کی جانب سے بیان میں کہا گیا ہے کہ 2 پاکستانی شہریوں کی ایران میں ہلاکت کی تصدیق ہوگئی، مقتولین کی شناخت مجاہد اور محمد فہیم کے نام سےہوئی ہے۔
ترجمان کا کہنا تھا کہ واقعہ سیستان بلوچستان کےعلاقےمیں پیش آیا، پاکستانی سفارتخانہ اور قونصل خانہ ایرانی حکام سے رابطے میں ہے، ایرانی حکام ضروری معاونت اور تعاون فراہم کررہے ہیں۔
دفترخارجہ نے کہا کہ میتوں کی جلدوطن واپسی کیلئے قانونی تقاضے پورے کیے جا رہے ہیں۔
ترجمان نے اس افسوسناک واقعے پر گہرے دکھ اور غم کا اظہار کرتے ہوئے کہا ہے کہ متاثرہ خاندانوں سے ہر ممکن تعاون کیا جائے گا۔
