اسلام آباد: وزیراعلیٰ بلوچستان سرفراز بگٹی کا کہنا ہے کہ بلوچستان میں کسی بڑے ملٹری آپریشن کی ضرورت نہیں خیبرپختونخوا طرز کا آپریشن کیا جاسکتا ہے۔
وزیراعلیٰ بلوچستان سرفراز بگٹی نے اسلام آباد میں پریس کانفرنس کرتے ہوئے کہا کہ ‘را ‘کی کٹھ پتلی فتنۃ الہندوستان کا بلوچوں سے کوئی تعلق نہیں، یہ خالصتاً دہشت گرد ہیں اور را فتنہ الہندوستان کی سرپرستی کررہا ہے۔
انہوں نے کہا کہ صوبائی وزیر منصوبہ بندی و ترقی ظہور احمد بلیدی اور چیف سیکریٹری بلوچستان کے ساتھ نیوز کانفرنس میں مزید کہا بھارت پاکستان کی ابھرتی معیشت کو برداشت نہیں کر پا رہا۔
سرفراز بگٹی نے کہا کہ پراکسیز کے ذریعے نئی سازش شروع کی ہے، اب سافٹ ٹارگٹ کو نشانہ بنا رہی ہے، ان کا جلد خاتمہ ہوگا، بلوچستان میں کسی بڑے فوجی آپریشن کی ضرورت نہیں لیکن خیبرپختونخوا طرز کا آپریشن کیا جاسکتا ہے۔
انہوں نے مزید کہا کہ مسنگ پرسنزکے حوالے سے قانون سازی کی ہے، معصوم لوگ مارے جاتے ہیں تب یہ خاموش ہوتے ہیں، کتنی بلوچ خواتین کو مارا جاتا ہے اس وقت کوئی بیان نہیں آتا۔
سرفراز بگٹی نے کہا کہ کونسا ملک اجازت دیتا ہے سڑک پر ملک توڑنے کی باتیں کریں، فتنہ الہندوستان سب سافٹ ٹارگٹ کو نشانہ بنارہی ہے اب ان کا خاتمہ ہوگا۔
