کراچی کے بجلی صارفین مہنگی بجلی اور طویل لوڈشیڈنگ کے عذاب سے دوچار ہیں تاہم عید سے دو روز قبل ان کے لیے بڑی خوشخبری آ گئی ہے۔
نیپرا نے کے الیکٹرک کے لیے بجلی 2 روپے 99 پیسے فی یونٹ سستی کر دی ہے اور اس کا نوٹیفکیشن بھی جاری کر دیا گیا ہے۔
نوٹیفکیشن کے مطابق یہ کمی مارچ کی ماہانہ فیول ایڈجسٹمنٹ کی مد میں کی گئی ہے اور کے الیکٹرک کے صارفین کو جون کے بجلی کے بلوں میں یہ ریلیف ملے گا۔
واضح رہے کہ کراچی شہر میں گرمی کی شدت بڑھتے ہی غیر اعلانیہ لوڈشیڈنگ کا دورانیہ بھی بڑھا دیا گیا ہے، جس پر صرف عام شہری نہیں بلکہ عوام کے منتخب نمائندے بھی سراپا احتجاج ہیں۔
دوسری جانب کے الیکٹرک کے سی ای او مونس علوی نے اے آر وائی نیوز کے پروگرام میں گفتگو کرتے ہوئے اعتراف کیا تھا کہ بجلی واقعی مہنگی ہے تاہم اس سے خود کو بری الذمہ قرار دیتے ہوئے حکومت پر ذمہ داری عائد کی تھی۔
