حساس اداروں اور این سی سی آئی ملتان کی بڑی کارروائی میں پاکستان سے چلنے والا عالمی سائبر کرائم نیٹ ورک پکڑا گیا۔
اے آر وائی نیوز کے مطابق حساس اداروں اور این سی سی آئی نے کارروائی میں 21 رکنی گروہ کے پانچ ارکان کو پکڑا ہے، ملزمان میں محمد اسلم، عدیل عزیز، اسامہ نواز، عبدالمعیز اور شعیب نذیر شامل ہیں۔
امریکا میں ایف بی آئی، ڈچ پولیس نے نیٹ ورک کی نشاندہی کی تھی، نوسربازوں کے ’ہارٹ سینڈر روپ‘ کی درجنوں ویب سائٹس بلاک کردی گئیں۔
ذرائع کے مطابق سرغنہ رمیز شہزاد امریکیوں سمیت غیرملکیوں سے کروڑ ڈالر کے فراڈمیں ملوث ہے جس کا تعلق فتح پورلیہ سے ہے جبکہ اس نے لاہور، ملتان میں نیٹ ورک بنا رکھا تھا۔
گروہ کا سرغنہ رمیز شہزاد ابوظبی سے آتا جاتا رہا ہے جس کی تفصیلات حاصل کرکے کروڑوں روپے مالیت کی قیمتی گاڑیاں اور دیگر اثاثے ضبط کرلیے گئے ہیں۔
ملزمان کی بیرون ملک سفر پر پابندی اور نام ایگزٹ کنٹرول لسٹ میں ڈال دیا گیا ہے۔
لاہور میں گروہ کے چار ارکان کے گھروں پرچھاپے مارے گئے اور بڑی مقدار میں ڈیجیٹل مواد برآمد کیا گیا ہے، ملزمان کے قبضے سے موبائل فونز، لیپ ٹاپس، ڈیٹا اسٹوریج ڈیوائسز برآمد ہوئیں۔
ملزمان کے خلاف پیکا اور دیگر دفعات کے تحت مقدمات درج کرلیے گئے ہیں۔
