آسٹریلیا اور نیوزی لینڈ نے ایران پر اسرائیلی حملوں کی شدید مذمت کرتے ہوئے حملے کو مشرق وسطٰی کیلئے ممکنہ طور پر تباہ کن قرار دے دیا۔
تفصیلات کے مطابق اسرائیل کی جانب سے ایران پر حملوں کے بعد عالمی برادری کا ردعمل آنا شروع ہو گیا۔
آسٹریلیا اور نیوزی لینڈ نے ایران پر اسرائیلی حملوں کی شدید مذمت کی، کیوی وزیر اعظم کرسٹوفر لکسن نے کہا اسرائیلی حملوں پر تشویش ہے اور یہ حملے مشرق وسطٰی کیلئے ممکنہ طور پر تباہ کن ہے۔
آسٹریلوی وزیر خارجہ کا کہنا تھا کہ اسرائیل اور ایران کی بڑھتی ہوئی کشیدگی پریشان کن ہے، اس سے خطہ مزید عدم استحکام کا شکار ہوگا۔
آسٹریلیا اور نیوزی لینڈ ان پانچ ممالک میں شامل ہیں جنہوں نے دو اسرائیلی وزراء پر سفری و مالی پابندیاں عائد کیں۔
مزید پڑھیں : اسرائیل نے ایران پر فضائی حملہ کردیا
یاد رہے اسرائیل نے ایران پر حملہ کرکے جنگ کا آغاز کرتے ہوئے ایران کی جوہری و فوجی تنصیبات کو نشانہ بنایا۔
حملے میں ایران کے آرمی چیف جنرل محمدباقری، پاسداران انقلاب کے کمانڈر انچیف حسین سلامی شہید ایران کے سابق سربراہ قومی سلامتی علی شمخانی شہید ہوئے۔
ایرانی میڈیا کا کہنا تھا کہ اسرائیل نے تہران میں پاسداران انقلاب کے صدردفتر کو نشانہ بنایا، جس میں جوہری سائنسدان فریدون عباسی اورمحمدمہدی بھی شہید ہوگئے۔
اسرائیلی فضائی حملے میں تہران میں کئی منزلہ عمارت منہدم ہوگئیں اور کئی عمارتوں سےآگ کے شعلے بلند ہورہے ہیں، حملوں سے متعدد رہائشی علاقے متاثر ہوئے ہیں، رہائشی عمارت پرحملے میں 5 افراد شہید اور 20 زخمی ہوئے۔
اسرائیلی وزیردفاع کا کہنا تھا کہ ایران پر حملوں کا پہلا مرحلہ مکمل کرلیا، ایران بھر میں درجنوں مقامات پر حملہ کیا ہے، ایرانی جوہری پروگرام اسرائیل کے لئے خطرہ ہے۔
