تہران : اسرائیلی حملے کے بعد ایران نے انتقام کی علامت ’سرخ جھنڈا‘ لہرا دیا اور کہا اسرائیل سے انتقام لیا جائے گا۔
تفصیلات کے مطابق اسرائیل کے ایران پر حملوں کے بعد ایرانی حکومت نے قم کی مسجد پر سرخ جھنڈا لہرا دیا ، جو علامتی اعلان جنگ سمجھا جاتا ہے۔
اسرائیل کے ایران کے ‘جوہری اور فوجی مقامات’ پر حملے میں آرمی چیف اور پاسداران انقلاب کے سربراہ سمیت دو سینئر جوہری سائنسدانوں کی شہادت کے بعد یہ قدم اٹھایا گیا ہے۔
واضح رہے شہر قم اہل تشیع کے لیے مقدس شہر سمجھا جاتا ہے، اس کی مشہور جمکرن مسجد پر جھنڈا لہرانے کی وڈیو ایرانی پریس ٹی وی کے ایکس اکاؤنٹ پر شیئر کی گئی ہے۔
یاد رہے ایران کے سپریم لیڈر آیت اللہ علی خامنہ ای نے اسرائیلی حملوں پر ردعمل دیتے ہوئے کہا تھا کہ اسرائیل کو حملے کی سخت سزا ملے گی، اسرائیل سخت سزا کا انتظار کرے۔
آیت اللہ خامنہ ای کا کہنا تھا اسرائیل نے راتوں رات حملہ کرکے آج اپنے لیے ایک تلخ اور تکلیف دہ تقدیر پر مہر ثبت کر دی ہے، اسرائیلی حکومت کو اب سنگین نتائج کیلئے تیار رہنا چاہیے۔
