ایران کے ممکنہ شدید ردعمل کے باعث اسرائیل کے بن گورین ایئرپورٹ سے یکے بعد دیگرے 8 مسافر طیارے روانہ ہوگئے، جس کے بعد ایئرپورٹ خالی کروا لیا گیا۔
غیر ملکی ذرائع ابلاغ کے مطابق بن گورین ایئرپورٹ کو طیاروں سے خالی کرالیا گیا ہے، ایئرپورٹ سے تمام طیاروں کو ہٹالیا گیا ہے۔
اسرائیلی ایئرپورٹ اتھارٹی کی جانب سے اس بات کی تصدیق کردی گئی ہے، بن گورین ایئرپورٹ سے آنے اور جانے والی تمام پروازیں منسوخ کردی گئی ہیں اور ہوائی اڈے کو مکمل طور پر خالی کروالیا گیا ہے۔
اسرائیلی میڈیا کا کہنا ہے کہ اسکی قومی ایئرلائن نے بھی اپنی تمام پروازیں معطل کردی ہیں، دیگر فضائی کمپنیوں نے اپنے مسافروں کو ہدایت کی کہ وہ ایئرپورٹ کا رُخ نہ کریں اور گھروں میں ہی رہیں۔
دوسری جانب اسرائیل کے حملے کے بعد ایران، عراق،شام اور اردن کی فضائی حدود بند کردیں اور ہوائی اڈوں پر فضائی آپریشن معطل کردیا۔
خبر ایجنسی نے بتایا کہ تہران کے امام خمینی ہوائی اڈے پر تمام پروازیں معطل کردی گئی ہیں اور پروازوں کا رخ دوسری جانب موڑ دیا گیا ہے۔
عراقی نیوز ایجنسی کا کہنا تھا کہ عراقی فضائی حدود بند کرکے تمام ہوائی اڈوں پر فضائی آپریشن معطل کردیا گیا ہے۔
اسرائیل کا ایران پر حملہ، بین الاقوامی مارکیٹس میں شدید مندی
مشرقی عراق، جو ایران کی سرحد کے قریب واقع ہے، دنیا کے مصروف ترین فضائی راستوں میں شمار ہوتا ہے، جہاں سے ہر وقت درجنوں پروازیں یورپ، خلیجی ممالک اور ایشیا کی طرف جاتی ہیں تاہم پروازوں کا رخ آہستہ آہستہ وسطی ایشیا یا سعودی عرب کی طرف موڑ دیا گیا ہے۔
دوسری جانب اردن کی وزارت خارجہ نے بھی کہا کہ فضائی حدود بند کر چکے ہیں، اپنی فضائی حدود کونہ میدان جنگ بننے دیں گے اور نہ ہی اس کی خلاف ورزی برداشت کریں گے۔
