فنانشل ایکشن ٹاسک فورس اجلاس میں بھی پاکستان کیخلاف بھارت کی کوششیں ناکام ہو گئی، چین نے پاکستان کے حق میں واضح موقف اختیار کیا۔
تفصیلات کے مطابق بھارت فنانشل ایکشن ٹاسک فورس ( ایف اے ٹی ایف) میں بھی ناکام اور پاکستان عالمی اعتماد کے ساتھ کامیاب ہوگیا۔
ذرائع نے کہا کہ بھارتی وفد نے پاکستان کو پھر گرے لسٹ میں شامل کرنے کی بھرپور کوشش کی، اجلاس میں پاکستان کوگرے لسٹ میں رکھنے کی بجائے رپورٹنگ پر رکھنے کا فیصلہ کیا گیا۔
ایف اے ٹی ایف فیصلے کے بعد بھارت اپنے مقاصد حاصل کرنے میں مکمل ناکام ہوگئی، چین نے پاکستان کے حق میں واضح موقف اختیار کیا اور ریلیف کی حمایت کی جبکہ ترکیہ اور چاپان نے بھی پاکستان کی مکمل حمایت کی۔
بنیان مرصوص کے بعد بھارت کی پاکستان کو سفارتی سطح پر تنہا کرنے کیلئے بھرپورکوششیں جاری ہے اور پاکستان کےخلاف پروپیگنڈا کیلئے بھارتی خفیہ ایجنسی ’’را‘‘ پیش پیش رہی ، ’’را‘‘نے پاکستان کو بدنام کرنے کیلئے نئی دہلی میں ایک ڈس انفو لیب قائم کی۔
ڈس انفو لیب کا مقصد پاکستان کے حوالے سے بین الاقوامی دنیا کو گمراہ کرنا ہے، بھارتی وفود مختلف ممالک گئے اور ہر جگہ پاکستان کے خلاف زہرافشانی کی تاہم دنیا کے کسی بھی ملک نے بھارت کےبیانیے کو پذیرائی نہیں دی۔
ذرائع کا کہنا تھا کہ بھارت اسرائیلی مددسےایف اے ٹی ایف کواستعمال کرنےکی بھرپورکوشش کررہاتھا، لیکن ایف اےٹی ایف کے رکن ممالک نے بھارت کے منفی پروپیگنڈے کو نظر انداز کیا، بھارت کی تمام تر سازشوں کے باوجود پاکستان کو گرے لسٹ میں شامل نہ کرنا ایک بڑی کامیابی ہے۔
آپریشن بنیان مرصوص کے بعد سے پاکستان کی سفارتی پوزیشن مسلسل مضبوط ہورہی ہے اور ہندوتوا ،صہیونی لابی کی مشترکہ کوششیں بھی پاکستان کو گرے لسٹ میں شامل کروانے میں ناکام رہی۔
