پیرس : فرانسیسی صدر ایمانویل میکرون نے بھی ایران کے جوہری پروگرام پر اپنی گہری تشویش کا اظہار کیا ہے۔
ایرانی صدر مسعود پیزشکیان سے ٹیلیفون پر گفتگو کرتے ہوئے ایمانویل میکرون کا کہنا تھا کہ ایران کا جوہری پروگرام باعث تشویش ہے۔
دونوں رہنماؤں نے اسرائیل کے ایران پر حملے کے بعد پیدا ہونے والی صورتحال پر تبادلہ خیال کیا۔
غیر ملکی خبر رساں ادارے کی رپورٹ کے مطابق فرانسیسی صدر نے اپنے ایرانی ہم منصب سے گفتگو کرتے ہوئے ایران سے جوہری مذاکرات کی بحالی پر زور دیا۔
ایمانویل میکرون نے کہا کہ دونوں فریقین کے درمیان مذاکرات ہی کشیدگی کم کرنے کا واحد راستہ ہیں انہوں نے کہا کہ اسرائیلی حملوں میں فرانسیسی شہریوں اور سفارتی عملے کو نشانہ نہ بنایا جائے۔
اس کے علاوہ ایرانی صدر سے بات چیت کرتے ہوئے فرانسیسی صدر نے ایران میں قید 2فرانسیسی شہریوں کی رہائی کا مطالبہ کیا، ان کا مزید کہنا تھا کہ خطے میں ممکنہ عدم استحکام پر تشویش ہے۔
مزید پڑھیں : ایران اور امریکا کے درمیان جوہری مذاکرات منسوخ
واضح رہے کہ ایران اور امریکا کے درمیان جوہری مذاکرات منسوخ ہوگئے ہیں، عمانی وزیر خارجہ نے ایران اور امریکا کے درمیان مسقط میں ہونے والے جوہری مذاکرات منسوخ ہونے کی تصدیق کردی ہے۔
عمانی وزیر خارجہ کا کہنا ہے کہ پائیدار امن کے حصول کا واحد راستہ سفارت کاری اور مذاکرات ہیں۔
علاوہ ازیں روسی وزیر خارجہ نے ایرانی ہم منصب سے رابطہ کرکے اسرائیلی حملوں کی شدید مذمت کی ہے۔
