تہران : سعودی ولی عہد شہزادہ محمد بن سلمان اور ایرانی صدر مسعود پیزشکیان کے درمیان ٹیلی فون پر رابطہ ہوا ہے۔
ایرانی خبر رساں ادارے تہران ٹائمز کی رپورٹ کے مطابق دونوں رہنماؤں نے اسرائیل کے ایران پر حملے کے بعد پیدا ہونے والی صورتحال پر تبادلہ خیال کیا۔
سعودی ولی عہد شہزادہ محمد بن سلمان کا کہنا تھا کہ اسرائیلی حکومت ایران سے تنازع بڑھانا چاہتی ہے تاکہ امریکا بھی اس جنگ میں شامل ہو۔
انہوں نے کہا کہ مجھے یقین ہے کہ ایران دانش مندانہ اقدام کرے گا، سعودی عرب ایران کے بھائیوں کے ساتھ ہے، آج پوری اسلامی دنیا ایران کی پشت پر کھڑی ہے۔
اس موقع پر ایرانی صدر مسعود پیزشکیان نے کہا کہ صدر کا منصب سنبھالنے کے بعد سے میری کوشش رہی ہے کہ خطے میں امن، استحکام اور سلامتی کو مضبوط کیا جائے۔
ان کا کہنا تھا کہ صیہونی حکومت نے ہر اُس جگہ رکاوٹیں کھڑی کیں اور تخریب کاری کی جہاں سے ہم کچھ حاصل کرنا چاہتے تھے، ایرانی صدر کا مزید کہنا تھا کہ سعودی عرب اور ایران مل کر خطے کو پرامن بنائیں گے۔
یاد رہے کہ 2023 میں برسوں کی دشمنی کے بعد سعودی عرب اور ایران کے درمیان سفارتی تعلقات کی بحالی کے معاہدے کے بعد دونوں ممالک کے تعلقات میں نمایاں بہتری آئی ہے۔
مزید پڑھیں : فرانسیسی صدر کا ایران کے جوہری پروگرام پر اظہار تشویش
اس سے قبل فرانسیسی صدر ایمانویل میکرون نے بھی ایران کے صدر مسعود پیزشکیان سے ٹیلیفون پر گفتگو کی۔ دونوں رہنماؤں نے اسرائیل کے ایران پر حملے کے بعد پیدا ہونے والی صورتحال پر تبادلہ خیال کیا۔
غیر ملکی خبر رساں ادارے کی رپورٹ کے مطابق فرانسیسی صدر نے اپنے ایرانی ہم منصب سے گفتگو کرتے ہوئے ایران سے جوہری مذاکرات کی بحالی پر زور دیا۔ ایمانویل میکرون کا کہنا تھا کہ ایران کا جوہری پروگرام باعث تشویش ہے۔
